कात्तिक १४, काठमाडौं । चन्द्रागिरि नगरपालिकामा अन्तर वार्डकप फुटबल प्रतियोगिता हुने भएको छ । चन्द्रागिरि नगरपालिका वडा नम्बर १४ को संयोजनमा चन्द्रागिरिमा वार्डकप फुटबल प्रतियोगिता हुन लागेको हो ।
चन्द्रागिरि अन्तर वार्डकप फुटबल प्रतियोगिता समितिका अध्यक्ष नेशन महर्जनले चन्द्रागिरि नगरपालिकामा विभिन्न समयमा फुटबल प्रतियोगिता हुने गरेको र त्यस्ता प्रतियोगितामा नगरका खेलाडी नभई बाहिरि खेलाडी ल्याई खेलाउने गरेकोले यो प्रतियोगितामा बाहिरि खेलाडीलाई पूर्णनिषेध गरिएको बताउनु भयो । उहाँले बाहिरबाट खेलाडी ल्याई खेल खेलाउँदा लाखौं रुपैयाँ सकिए पनि प्रतियोगिता प्रतियोगितामा मात्र सिमित हुँदै गएको उल्लेख गर्नुभयो ।
अध्यक्ष महर्जनले चन्द्रागिरि नगरपालिका भित्र स्थायी रुपमा बसोबास गर्दै आएका १५ वटै वडाका स्थानीय खेलाडीले मात्र वार्डकप फुटबल प्रतियोगितामा सहभागिता जनाउन पाउने र यही खेलको आधारमा उत्कृष्ठ १५ वटै वडाका खेलाडीलाई चन्द्रागिरि नगरस्तरीय टिम छनोट गरिने पनि बताउनु भयो । उहाँले अन्यत्रबाट आई चन्द्रागिरिमा बसोबास गरेका खेलाडीको हकमा भने बसाई सराईको प्रमाणपत्र अनिवार्य भएको उल्लेख गर्नुभयो ।
