भदौ २०, काठमाडौं । अर्जेन्टिना फुटबल संघ (एएफए) ले राष्ट्रिय टोलीबाट सन्यास लिएका लियोनल मेसीको सम्मानमा देशभरका फुटबल खेल १०औँ मिनेटमा रोक्दै एक मिनेट ताली बजाउने निर्णय गरेको छ। एएफएका अनुसार पुरुष तथा महिला फुटबलका साथै फुटसल र बिच सकरका खेलसमेत पहिलो हाफको १०औँ मिनेटमा रोकिएर मेसीको राष्ट्रिय टोलीमा गरेको योगदानको सम्मान गरिनेछ। रंगशालामा ठूलो पर्दा जडान गरिएको भए खेल सुरु हुनुअघि मेसीको सम्मानमा तयार पारिएको भिडियोसमेत प्रदर्शन गरिनेछ।
मेसीले यसै साता अर्जेन्टिनाको राष्ट्रिय टोलीबाट सन्यासको घोषणा गरेका थिए। २०२६ को विश्वकप फाइनलमा स्पेनसँग पराजित भएपछि उनले राष्ट्रिय टोलीका लागि आफ्नो यात्रा टुंग्याउने निर्णय गरेका हुन्। ३९ वर्षीय मेसीले अब अर्जेन्टिनाका लागि अन्तर्राष्ट्रिय खेल नखेल्ने बताएका छन्।
सन् २००५ मा राष्ट्रिय टोलीमा डेब्यु गरेका मेसी अर्जेन्टिनाका सर्वाधिक गोलकर्ता हुन्। उनले २०७ अन्तर्राष्ट्रिय खेलमा १२५ गोल गरेका छन्। उनी ६ वटा विश्वकप खेल्ने खेलाडीसमेत हुन्।
मेसीले सन् २०२२ मा अर्जेन्टिनालाई विश्वकपको उपाधि जिताउन महत्वपूर्ण भूमिका खेलेका थिए। २०२६ को विश्वकपमा पनि अर्जेन्टिनालाई फाइनलसम्म पुर्याउँदै उनले आफ्नो अन्तर्राष्ट्रिय करियर टुंग्याएका छन्।
मेसीको १० नम्बर जर्सीलाई सम्मान गर्दै १०औँ मिनेटमा खेल रोकेर ताली बजाउने एएफएको निर्णयले अर्जेन्टिनी फुटबलमा उनको प्रभाव र योगदानको विशेष सम्मान गर्नेछ।
