जेठ २२, काठमाडौं । प्रहरी महानिरीक्षक दानबहादुर कार्कीले पदोन्नति भएका ४४ जना प्रहरी अधिकृतलाई दर्ज्यानी चिन्हद्वारा सुशोभित गरेका छन् । प्रहरी प्रधान कार्यालयमा शुक्रबार आयोजित विशेष समारोहमा प्रहरी महानिरीक्षक कार्कीले पदोन्नति प्राप्त अधिकृतहरूलाई दर्ज्यानी चिन्ह प्रदान गरेका हुन् ।
नेपाल सरकारका प्रधानमन्त्री तथा गृहमन्त्रीस्तरको जेठ २१ गतेको निर्णयअनुसार जनपदतर्फ १ जना र प्राविधिकतर्फ ३ जना गरी ४ जना प्रहरी वरिष्ठ उपरीक्षक पदमा पदोन्नति भएका छन्। यस्तै, गृह मन्त्रालय (सचिवस्तर) को सोही मितिको निर्णयबाट जनपदतर्फ १ जना र प्राविधिकतर्फ १२ जना गरी १३ जना प्रहरी उपरीक्षक पदमा पदोन्नति भएका छन् । साथै १६ जना प्राविधिक प्रहरी नायव उपरीक्षक र १४ जना प्राविधिक प्रहरी निरीक्षक गरी कुल ४७ जनामध्ये ४४ जना अधिकृत दर्ज्यानी चिन्हद्वारा सुशोभित भएका हुन् ।
पदोन्नति भएका अधिकृतमध्ये १ जना प्राविधिक प्रहरी उपरीक्षक र २ जना प्राविधिक प्रहरी नायव उपरीक्षक हाल तालिमका क्रममा कोरियामा रहेकाले समारोहमा सहभागी हुन नसकेको जनाइएको छ ।
समारोहलाई सम्बोधन गर्दै प्रहरी महानिरीक्षक कार्कीले पदोन्नति प्राप्त अधिकृतहरूलाई बधाई तथा सफल कार्यकालको शुभकामना व्यक्त गर्दै लगनशीलता, इमानदारिता, व्यावसायिक निष्ठा र सेवाप्रतिको प्रतिबद्धताको मूल्याङ्कनका आधारमा पदोन्नति भएको उल्लेख गर्दै नयाँ जिम्मेवारीमा अझ सिर्जनशील, जवाफदेही र संवेदनशील भएर काम गर्न निर्देशन दिए ।
