असोज १०, काठमाडौं । पछिल्लो २४ घण्टामा देशका विभिन्न स्थानमा भएका सवारी दुर्घटनामा ५ जनाको मृत्यु भएको छ भने ६१ जना घाइते भएका छन् । प्राप्त विवरणअनुसार बारा, भक्तपुर, नवलपरासी, रुपन्देही र कपिलवस्तुमा भएका छुट्टाछुट्टै सवारी दुर्घटनामा एक–एक जनाको मृत्यु भएको हो ।
बारामा स्कुटरलाई ट्रकले ठक्कर दिँदा घाइते भएका ३५ वर्षीय चालकको उपचारका क्रममा मृत्यु भएको छ । भक्तपुरमा स्कुटर अनियन्त्रित भई दुर्घटना हुँदा घाइते २८ वर्षीय चालकको उपचारका क्रममा मृत्यु भएको प्रहरीले जनाएको छ ।
त्यस्तै, नवलपरासीमा मोटरसाइकल दुर्घटनामा ३२ वर्षीय चालक, रुपन्देहीमा ई–रिक्सा दुर्घटनामा २८ वर्षीय यात्रु तथा कपिलवस्तुमा दुई मोटरसाइकल आपसमा ठोक्किँदा ५० वर्षीय चालकको मृत्यु भएको विवरणमा उल्लेख छ ।
दुर्घटनामा घाइते भएकाहरूको विभिन्न अस्पतालमा उपचार भइरहेको छ ।
