चैत १५, काठमाडौं । रोयल च्यालेन्जर्स बेंगलुरुले इण्डियन प्रिमियर लिग (आइपीएल) मा चेन्नई सुपर किंग्सलाई जितका लागि १ सय ९७ रनको लक्ष्य दिएको छ। चेन्नइको घरेलु मैदान एमए चिदम्बरम अन्तर्राष्ट्रिय क्रिकेट स्टेडियम चेपकमा टस हारेर ब्याटिङको निम्तो पाएको बेंगलुरुले निर्धारित २० ओभरमा ७ विकेट गुमाएर १ सय ९६ रनको योगफल तयार गरेको थियो ।
बेंगलुरुको लागि कप्तान रजत पाटीदारले ३२ बलको सामना गर्दै ४ चौका र ३ छक्काको सहयोगमा सर्वाधिक ५१ रन जोडे ।
बेंगलुरुको कप्तानको रुपमा पहिलो अर्धशतक पाटीदारले ३० बलमा पूरा गरे । ओपनर फिल साल्टले १६ बलमा ५ चौका र १ छक्काको सहयोगमा ३२ रन जोडे । विराट कोहली ३० बलमा २ चौका र १ छक्काको सहयोगमा ३१ रन बनाउँदै आउट गरे ।
देवदत्त पटीकल १४ बलमा २७, जितेश शर्मा ६ बलमा १२ तथा लियम लिभिङ्स्टोन ९ बलमा १० रनमा आउट भए ।
कोलकाता नाइटराइडर्ससँगको अघिल्लो खेलमा प्लेयर अफ द म्याच बनेका कुर्नाण पाण्ड्या रनको खाता नखोल्दै आउट भए । टिम डेबिड ६ बलमा २२ रन बनाउँदै अविजित रहे ।
चेन्नईका लागि नुर अहमदले ३, मथिशा पथिरानाले २ तथा खलिल अहमद तथा रविचन्द्रन आश्विनले समान १ विकेट लिए ।
दुवै टोलीले जितबाट आइपिएलको सुरुवात गरेका थिए।बेंगलुरुले कोलकाता नाइटराईडर्सलाई र चेन्नईले मुम्बई इण्डियन्सलाई हराएको थियो । सन् २००८ मा भएको आइपिएलको पहिलो संस्करणमा बाहेक बेंगलरुले चेपकमा कुनै खेल जितेको छैन।
चेन्नई र बेंगलुरुबीच हालसम्म ३३ खेल भएको छ । जसमा २१ पटक चेन्नई र ११ पटक बेंगलुरु विजयी भएको थियो । १ खेल विना नतिजा कै सकिएको थियो ।
