बैशाख १५,काठमाडौं । रेडियो नेपालबाट दैनिक प्रसारण हुने अन्तरसम्वाद कार्यक्रमको सोमबारको श्रृङ्खलामा पूर्व प्रधानमन्त्री बाबुराम भट्टराईलाई अतिथि बोलाइएको रेडियो नेपालले माफी मागेको छ । समाचार महाशाखा प्रमुख नवराज लम्साल सञ्चालक रहेको कार्यक्रममा भट्टराईले प्रधानमन्त्री केपी शर्मा ओलीको चर्को आलोचना गरेका कारण रेडियो नेपालले माफी माग्नु परेको हो ।
रेडियो नेपालले विज्ञप्ती जारी गर्दै माफी मागेको छ । रेडियो नेपाल प्रसार सेवा विकास समितिका कार्यकारी निर्देशक सुरेश कुमार कार्कीद्वारा हस्ताक्षरित विज्ञप्तीमा भनिएको छ :
‘रेडियो नेपालबाट दैनिक प्रसारण हुने कार्यक्रम अन्तरसम्वादअन्तर्गत आज मिति २०७७/०१/१५ गते बिहान ६ः३० बजे समाचार महाशाखा प्रमुख डा नवराज लम्सालद्वारा सञ्चालित उक्त कार्यक्रममा पूर्व प्रधानमन्त्री डा बाबुराम भट्टराईलाई अतिथिका रुपमा निम्त्याइएकोमा उहाँले सम्माननीय प्रधानमन्त्री केपी शर्मा ओलीज्यूप्रति लक्षित गरी प्रयोग गर्नुभएको भाषा र विचारले हामीलाई दुखी तुल्याएको छ । सो कार्यक्रम प्रत्यक्ष (लाईभ) प्रसारण भएकोले आवश्यक सम्पादन गर्न नसकिएको हुँदा क्षमा चाहन्छौं । अब उप्रान्त रेडियो नेपालबाट प्रसार हुने कार्यक्रमहरुमा अतिथि चयन गर्दा गम्भीर रुपमा सचेत रहने प्रतिवद्धता पनि व्यक्त गर्दछौं ।’
सुरेश कुमार कार्की
कार्यकारी निर्देशक
हेर्नुहोस विज्ञप्ती
