भदौ २५, काठमाडौं । नेपाली क्रिकेटको इतिहासमा ६ सेप्टेम्बर १९९६ एउटा अविस्मरणीय र गौरवपूर्ण दिनका रूपमा अंकित छ। यही दिन मलेसियामा आयोजित प्रथम एसीसी ट्रफीमार्फत नेपाली क्रिकेटले औपचारिक रूपमा अन्तर्राष्ट्रिय क्रिकेट यात्राको ऐतिहासिक शुभारम्भ गरेको थियो।
आज नेपाली क्रिकेटले अन्तर्राष्ट्रिय स्तरमा ठूलो फड्को मार्दै विश्व क्रिकेटमा आफ्नो पहिचान स्थापित गरिसकेको छ। तर, यो यात्राको जग निर्माण गर्ने ती अग्रज खेलाडी, प्रशिक्षक, व्यवस्थापक तथा क्रिकेट नेतृत्वलाई सम्झिँदा १९९६ को त्यो ऐतिहासिक टोलीप्रति सम्मान अझ गहिरो भएर आउँछ।
त्यतिबेला नेपाली टोलीको नेतृत्व उत्तम कर्माचार्यले गरेका थिए भने एल.बी. क्षेत्री उपकप्तानको भूमिकामा थिए। टोलीमा Manish Raj Pandey, Pawan Agrawal, Raju Khadka, Basant Shahi Thakuri, Jagat Tamatta, Mosharraf Izhar, Sanjay Gurung, Pukar Pant, Kiran SJB Rana, Ritesh Baral, Bishal Gupta तथा स्वर्गीय Ganesh Bdr. Shahi लगायतका खेलाडीहरू रहेका थिए।
टोलीको व्यवस्थापन र प्राविधिक पक्षमा पनि तत्कालीन समयका महत्वपूर्ण व्यक्तित्वहरूको योगदान रहेको थियो। Team Leader स्वर्गीय T.B. Shah, Team Coach Sunoj Bhattarai तथा Assistant Manager स्वर्गीय Shasi Datta Pandeyले टोलीलाई आवश्यक मार्गदर्शन र व्यवस्थापन प्रदान गरेका थिए।
त्यसैगरी, नेपाली क्रिकेटको संस्थागत विकासमा तत्कालीन CAN President स्वर्गीय Jay Kumar Nath Sah र CAN Secretary Binaya Raj Pandeyको भूमिका पनि महत्वपूर्ण रहेको थियो।
नेपालले अन्तर्राष्ट्रिय क्रिकेटमा आफ्नो यात्रा सुरु गर्दा आजको जस्तो आधुनिक पूर्वाधार, सुविधा र व्यावसायिक वातावरण थिएन। सीमित स्रोत–साधनका बीच पनि नेपाली क्रिकेटलाई अन्तर्राष्ट्रिय मञ्चमा पुर्याउने साहस र समर्पण ती अग्रज पुस्ताले देखाएको थियो। उनीहरूले सुरु गरेको यात्राकै निरन्तरताका रूपमा आज नेपाली क्रिकेट विश्व क्रिकेटको आकर्षण बन्न सफल भएको छ।
त्यसैले ६ सेप्टेम्बर १९९६ केवल एउटा क्रिकेट प्रतियोगितामा सहभागिता जनाएको मिति मात्र होइन, नेपाली क्रिकेटको अन्तर्राष्ट्रिय पहिचान निर्माणको आधारशिला राखिएको ऐतिहासिक दिन पनि हो।
समय बित्दै जाँदा त्यो टोलीका धेरै सदस्यहरू क्रिकेटबाट अलग भइसकेका छन् भने केही अग्रज व्यक्तित्व तथा खेलाडीहरू हामीमाझ छैनन्। उनीहरूको योगदान र समर्पण भने नेपाली क्रिकेटको इतिहासमा सदैव जीवित रहनेछ।
नेपाली क्रिकेटको अन्तर्राष्ट्रिय यात्राको त्यो पहिलो अध्याय लेख्ने सम्पूर्ण खेलाडी, प्रशिक्षक, व्यवस्थापन टोली तथा क्रिकेटका अग्रज व्यक्तित्वहरूप्रति आजको दिन हार्दिक कृतज्ञता र उच्च सम्मान व्यक्त गरिएको छ।
साथै, हामीमाझ नरहनुभएका स्वर्गीय Ganesh Bdr. Shahi, स्वर्गीय T.B. Shah, स्वर्गीय Shasi Datta Pandey, स्वर्गीय Jay Kumar Nath Sah लगायत सम्पूर्ण दिवंगत खेलाडी तथा अग्रज व्यक्तित्वहरूप्रति भावपूर्ण श्रद्धाञ्जली अर्पण गर्दै शतशत नमन।
नेपाली क्रिकेटको त्यो सुनौलो सुरुवात, त्यो ऐतिहासिक टोली र उनीहरूले सँगै रचेको इतिहास नेपाली क्रिकेटको स्मृतिमा सधैं अमर रहनेछ।
