असोज १२, कैलाली । कैलाली जिल्ला क्रिकेट संघको आयोजनामा फाप्ला क्रिकेट मैदान, धनगढीमा जारी टी–१० राष्ट्रिय क्रिकेट च्याम्पियनसिप–२०८३ अन्तर्गत भोलि सेमिफाइनल तथा फाइनलका खेलहरू हुँदैछन्। प्रतियोगिताको निर्णायक चरणका खेलहरू led स्क्रिनसहित राष्ट्रिय टेलिभिजन काष्ठमण्डप गोल्डबाट प्रत्यक्ष प्रसारण गरिने आयोजकले जनाएको छ।
प्रतियोगितामा उत्कृष्ट प्रदर्शन गर्दै अन्तिम चारमा स्थान बनाएका चार टोलीबीच सेमिफाइनलमा प्रतिस्पर्धा हुनेछ। पहिलो सेमिफाइनलमा चैतन्य पाठशाला र बझाङ जिल्ला क्रिकेट संघ आमनेसामने हुनेछन्। दोस्रो सेमिफाइनलमा सत्यवती एकेडेमी बी र डिसिए क्रिकेट क्लव बीच प्रतिस्पर्धा हुनेछ। सेमिफाइनलमा जित निकाल्ने दुई टोलीले उपाधिका लागि फाइनलमा प्रतिस्पर्धा गर्नेछन्। फाप्ला क्रिकेट मैदानमा हुने फाइनल खेलसँगै प्रतियोगिताको विजेताको टुंगो लाग्नेछ।
प्रतियोगिताको उपाधि जित्ने टोलीले नगद ४ लाख १ हजार १११ रुपैयाँसहित ट्रफी, प्रमाणपत्र तथा मेडल प्राप्त गर्नेछ। त्यस्तै उपविजेता टोलीले नगद १ लाख १ हजार १११ रुपैयाँसहित ट्रफी, प्रमाणपत्र तथा मेडल प्राप्त गर्नेछ।
प्रतियोगितामा व्यक्तिगत विधातर्फ पनि आकर्षक पुरस्कारको व्यवस्था गरिएको छ। प्रतियोगिताको सर्वोत्कृष्ट खेलाडीले नगद २० हजार रुपैयाँसहित ट्रफी र प्रमाणपत्र प्राप्त गर्नेछन्। यस्तै उत्कृष्ट ब्याटर, उत्कृष्ट बलर र इमर्जिङ खेलाडीले समान रूपमा नगद १०–१० हजार रुपैयाँसहित ट्रफी तथा प्रमाणपत्र प्राप्त गर्नेछन्।
टी–१० ढाँचाको छोटो र रोमाञ्चक क्रिकेटमा समूह चरणदेखि नै प्रतिस्पर्धात्मक खेलहरू हुँदै आएका कारण सेमिफाइनलका दुवै खेलमा कडा प्रतिस्पर्धाको अपेक्षा गरिएको छ। अन्तिम चारमा पुगेका टोलीहरू उपाधि नजिक पुगिसकेकाले भोलिका खेलमा ब्याटिङ, बलिङ र फिल्डिङमा उत्कृष्ट प्रदर्शन गर्ने टोली नै फाइनलमा पुग्नेछ।
फाप्ला क्रिकेट मैदानमा हुने निर्णायक खेलहरूलाई थप आकर्षक बनाउन एलईडी स्क्रिनसहित प्रत्यक्ष प्रसारणको व्यवस्था गरिएको छ। यसले मैदानमा उपस्थित दर्शकसँगै टेलिभिजनमार्फत देशभरका क्रिकेटप्रेमीलाई प्रतियोगिताका महत्वपूर्ण क्षण प्रत्यक्ष हेर्ने अवसर प्रदान गर्नेछ।
आयोजक कैलाली जिल्ला क्रिकेट संघले प्रतियोगिताको सेमिफाइनल तथा फाइनल खेल हेर्न क्रिकेटप्रेमीलाई फाप्ला क्रिकेट मैदानमा उपस्थित हुन आग्रह गरेको छ। भोलिका खेलसँगै टी–१० राष्ट्रिय क्रिकेट च्याम्पियनसिप–२०८३ को उपाधि कसले उचाल्ने भन्ने टुंगो लाग्नेछ।
