असोज १२, काठमाडौं । नेकपा एमालेकी सांसद पदम कुमारी अर्यालले असोज ८ गतेदेखि ११ गतेसम्म परेको अविरल वर्षाका कारण देशका विभिन्न क्षेत्रमा ठूलो जनधनको क्षति भएको भन्दै सरकारको ध्यानाकर्षण गराएकी छन् । सोमबार बसेको प्रतिनिधिसभा बैठकमा बोल्दै उनले वर्षाका कारण कतै बस्ती डुबानमा परेको, कतै पहिरोले घर पुरिएको तथा सडक र पुलहरू क्षतिग्रस्त भएको बताइन् । कतिपय नागरिक सम्पर्कविहीन रहेको र केही परिवार सुरक्षित स्थानको खोजीमा रहेको बताइन् ।
उनले यस्तो अवस्थामा सरकारको पहिलो दायित्व नागरिकको जीवन रक्षा गर्नु रहेको बताउँदै तत्काल उद्धार तथा राहतको व्यवस्था गर्न माग गरिन् । साथै, बाढीपहिरोबाट भएको क्षतिको यथार्थ विवरण तत्काल संकलन गर्नुपर्नेमा पनि उनले जोड दिइन् ।
कालीगण्डकीलाई तटीय क्षेत्र बनाएर गण्डकी प्रदेशका मुस्ताङ, म्याग्दी, बागलुङ, पर्वतलगायत ११ जिल्ला बाढी, पहिरो, हिमपहिरो र डुबानबाट प्रभावित भएको उनले बताइन् ।
बाढीपहिरोका कारण ठूलो जनधनको क्षति भएको प्रारम्भिक विवरण प्राप्त भएको उनले बताइन् ।
