असोज २७, काठमाडौं । दक्षिण एसियाली देश माल्दिभ्सले आमाबाट बच्चामा हेपाटाइटिस बीको प्रसारण उन्मूलन गरेको छ । विश्व स्वास्थ्य संगठनले माल्दिभ्सलाई यो उपलब्धिको लागि बधाई दिएको छ । विश्व स्वास्थ्य संगठनका अनुसार, माल्दिभ्स ‘ट्रिपल उन्मूलन’ हासिल गर्ने विश्वको पहिलो देश हो ।
संगठनले आमाबाट बच्चामा हेपाटाइटिस बीको प्रसारण उन्मूलन गर्नुका साथै, देशले आमाबाट बच्चामा एचआईभी र आमाबाट बच्चामा सिफिलिसको प्रसारण उन्मूलन गरिसकेको जानकारी दिएको छ ।
माल्दिभ्सका राष्ट्रपति मोहम्मद मुइज्जुले यस अवसरमा भनेका छन्- ‘आज, माल्दिभ्सले इतिहास रचेको छ । हामी आमाबाट बच्चामा एचआईभी, सिफिलिस र हेपाटाइटिस बीको प्रसारण उन्मूलन गर्ने लक्ष्य हासिल गर्ने विश्वको पहिलो देश भएकोमा गर्व गर्छौं ।’
