चैत २६, काठमाडौं । इण्डियन प्रिमियर लिग (आइपिएल) मा गुजरात टाइटन्सविरुद्धको खेलमा राजस्थान रोयल्सले टस जितेको छ। टस जितेर राजस्थानले फिल्डिङ रोजेको छ।

गुजरात चौथो र राजस्थान तेस्रो जित निकाल्ने दाउमा आज मैदानमा उत्रनेछन्। गुजरात टाइटन्स अहिले अंक तालिकाको दोस्रो स्थानमा छ।
उसले ४ खेलबाट ३ जित सहित ६ अंक बनाएको छ।उसको जितमा उनीहरूको शीर्ष तीन ब्याटर शुभमन गिल, साई सुदर्शन र जोस बटलरको प्रदर्शन गर्दै उत्कृष्ट रहेको छ।
गुजरात टाइटन्सका कागिसो रबाडा व्यक्तिगत कारणले घर फर्केकाले उनको सट्टा इशान्त शर्माले मौका पाउनेछन्।
राजस्थान रोयल्सले अघिल्लो खेलमा कप्तान सामसनको पुनरागमन र जैसवालको लयमा फर्किएको प्रदर्शनसँगै राम्रो तालमेल देखिएको छ। राजस्थानले ४ खेलमा २ जित र २ हार बेहोरेको छ। उसँग ४ अंक रहेको छ।
यी दुई बीच यसअघि ६ पटक प्रतिस्पर्धा भएको छ। ५ पटक गुजरातले र १ पटक राजस्थानले खेल जितेको छ।