मंसिर १२, काठमाडौं । काठमाडौं महानगरपालिकाका मेयर विद्यासुन्दर शाक्यलाई सिसडोल बन्चरे फोहोरमैला व्यवस्थापन सरोकार समितीले ल्याण्डफिल साइटमा भएको समस्याका बारेमा ज्ञापन पत्र बुझाइएको छ । सिसडोल बन्चरे फोहोरमैला व्यवस्थापन सरोकार समितीेका अध्यक्ष नवराज ढुङ्गाना (विश्वास)को नेतृत्वमा गएको टोलीले एक कार्यक्रमका बिच राष्ट्रिय सभा गृहमा मेयर शाक्यलाई ज्ञापन पत्र बुझाएका हुन ।
उपत्यकाको फोहोरले सिसडोल आसपासका बस्तीहरुमा विगत १५ वर्षदेखि निरन्तर आतंक मचाउदैं आइरहेकोले मानव स्वास्थ्य र भौतिक वातावरण नै ध्वस्त पारेको अवस्थामा सो समस्या हल गर्नका लागि प्रधानमन्त्री तथा मन्त्री परिषदबाट वा मुख्य सचिव र सम्बन्धित मन्त्रालयका सचिवहरु, विषयगत समितीहरु र उपत्यका नगर फोरम सहित सरोकारवालाहरुको प्रतिनिधीको उपस्थितीमा संयुक्त बैठक बसि निर्णय गर्नुपर्न भन्दै सरोकार समितीले ११ बुदे माग काठमाडौंका मेयर शाक्यलाई बुझाएको सरोकार समितीका अध्यक्ष नवराज ढुङ्गाना (विश्वास)ले बताउनु भयो । उहाँले ज्ञापन पत्र बुझाएको १५ दिन भित्रमा ११ बुदे मागको संबोधन नभए वा बेवास्ता गरिए फोहेरमैला रोकीने पनि बताउनु भयो ।
काठमाडौं महानगरपालिकाका मेयर विद्यासुन्दर शाक्यलाई ज्ञापन पत्र बुझाउन सरोकार समितीका अध्यक्ष विश्वास सहित समितीका सदस्यहरु राममणी घिमीरे, राजन न्यौपाने, भुवन अर्याल, दिपेश सापकोटा लगायतको उपस्थिती रहेको थियो ।
