भदौ ८,रुकुमपश्चिम। गुल्मीकी २६ वर्षीया स्वस्तिका पौडेल र उनकी दुई वर्षीया छोरी सान्दिका ज्ञवालीका लागि त्यो आइतबारको बिहान एउटा सामान्य यात्राको सुरुवात मात्रै थियो। काखमा सानी छोरी च्यापेर, श्रीमानसँगको भेटको मीठो स्मृति बोकेर उनीहरू रुकुम पश्चिमबाट सुर्खेततर्फको घर फर्किंदै थिए। तर, उनीहरूको यो यात्रा कहिल्यै गन्तव्यसम्म पुग्न पाएन।
रुकुम पश्चिमको सानीभेरी गाउँपालिका–८, सिम्ली बजार नजिकै मध्यपहाडी राजमार्गमा घटेको एउटा हृदयविदारक दुर्घटनाले यो आमा–छोरीको जोडीलाई सदाका लागि खोस्यो l
सपना बोकेको अन्तिम यात्रा
स्वस्तिकाका श्रीमान् रुकुम पश्चिमको मुसिकोटस्थित एक बैंकमा कार्यरत थिए। परिवारसँग केही पल बिताउने र माया साटासाट गर्ने उद्देश्यले नै स्वस्तिका अबोध छोरीलाई लिएर मुसिकोट पुगेकी थिइन्। श्रीमानलाई भेटेर मनमा अनगिन्ती खुसी र घर फर्किने उमंग बोकेर उनीहरू हाइस चढेका थिए। सफरकै क्रममा गाडी शौचालयका लागि केही क्षण बाटोमा रोकियो। त्यही सानो विश्राम उनीहरूको जीवनको अन्तिम विश्राम बन्न पुग्यो। सडकछेउमा रहेको बेला पछाडिबाट आएको भे.१ ज. १४४२ नम्बरको विद्युतीय हाइसले अनियन्त्रित भई उनीहरूलाई ठक्कर दियो।
एकैक्षणमा उज्यालोबाट अँध्यारोमा
केही सेकेन्डअघिसम्म हाँसोखुसीका साथ घरको प्रतीक्षा गरिरहेको त्यो परिवारमा एकैक्षणमा बज्रपात भयो। हाइसको तीव्र ठक्करबाट आमा–छोरी दुवैको घटनास्थलमै प्राण गयो। भविष्यका सपना बुनिरहेकी एक तमु आमा र जीवनको भर्खरै श्रीगणेश गर्दै गरेकी दुई वर्षीया सान्दिकाको अबोध जीवन बाटोमै अस्तायो। घटनास्थलको त्यो दृश्य देख्ने जोकोहीको पनि मुटु काँपेको छ। एउटा गाडीको लापरबाही वा दुर्घटनाले एउटा हँसिलो परिवारको खुसीलाई सदाका लागि खोसिएको छ।
गहिरो शोकमा परिवार र समुदाय
यो अकल्पनीय दुर्घटनाले गुल्मीको रुरु क्षेत्रस्थित उनीहरूको माइती र परिवारलाई मात्र होइन, सम्पूर्ण रुकुम पश्चिमको स्थानीय समुदायलाई गहिरो शोकमा डुबाएको छ। सानी नानीका बाबा र आफन्तहरूमा परेको यो असह्य पीडा शब्दमा व्यक्त गर्न सक छैन। प्रहरीले घटनाको सम्बन्धमा थप अनुसन्धान अघि बढाइरहेको जनाएको छ। तर, अनुसन्धान र कानुनी प्रक्रिया जति अघि बढे पनि, बाटोमै खोसिएको आमा–छोरीको प्राण र उनीहरूको अधुरा सपना कसैले पनि फर्काउन सक्ने छैन।
