साउन १५, काठमाडौं । अमेरिकी राष्ट्रपति डोनाल्ड ट्रम्पले गाजा क्षेत्रमा हमास र अन्य सशस्त्र समूहहरूको ‘पूर्ण निशस्त्रीकरण’ का लागि सहमति जुटेको बताएका छन्। हमासका एक वरिष्ठ अधिकारीले बीबीसीलाई बताएअनुसार उनीहरू गाजामा पूर्ण निशस्त्रीकरण गर्ने योजनामा सहमत भएका छन् र यससम्बन्धी आधिकारिक विज्ञप्ति छिट्टै जारी गरिने भएको छ । ट्रम्पले शान्ति योजना घोषणा गरेपछि गाजामा निशस्त्रीकरण गर्न सहमत भएको हमासले प्रारम्भिक प्रतिक्रिया दिएको हो ।
अमेरिकी राष्ट्रपति ट्रम्पले ‘निशस्त्रीकरण पूरा हुनासाथ’ इजरायल गाजाबाट पछि हट्ने बताएका छन्। साथै, उनले यस सम्झौतालाई ‘गाजामा अन्ततः नयाँ प्यालेस्टिनी सरकारद्वारा शासन सञ्चालन हुने दिशामा एउटा महत्त्वपूर्ण कदम’ हुने पनि टिप्पणी गरेका छन ।
इजरायलले यस योजनाबारे अहिलेसम्म कुनै प्रतिक्रिया दिएको छैन। अमेरिकी अधिकारीहरूले पत्रकारहरूसँगको कुराकानीमा भनेका छन् कि यदि इजरायल सम्झौताअनुसार पछि हटेन भने ट्रम्प अत्यन्त निराश हुनेछन्। अमेरिकाको मध्यस्थतामा अघि बढाइएको गाजा युद्धविराम योजनाको दोस्रो चरणमा हमासको निशस्त्रीकरण पनि समावेश छ। उता, ‘बोर्ड अफ पिस’ द्वारा सम्झौतालाई ‘ऐतिहासिक उपलब्धि’ को संज्ञा दिएको छ ।
‘बोर्ड अफ पिस’ले सामाजिक सञ्जालमा एक विज्ञप्ति जारी गरेको छ। जसअनुसार सम्झौताले गाजामा नयाँ शासन व्यवस्था, सुरक्षा, मानवीय राहत, पुनर्निर्माण र आर्थिक पुनरुत्थान स्थापना गर्ने राष्ट्रपति डोनाल्ड ट्रम्पको दृष्टिकोणलाई अघि बढाउन महिनौँसम्म चलेका गहन र असल नियतका वार्ताहरूलाई निष्कर्षमा पुर्याएको बोर्डले जनाएको छ।
बोर्डले यो सम्झौताले गाजाका जनतालाई महत्त्वपूर्ण लाभ पुर्याउने सम्भावना बोकेको उल्लेख गर्दै ‘यो मार्गचित्र एक ऐतिहासिक उपलब्धिका रूपमा रहेको छ। पहिलो पटक, हमासले आफ्ना सम्पूर्ण हतियारहरू त्याग्ने कार्यान्वयन योग्य योजनाप्रति आधिकारिक रूपमा प्रतिबद्धता जनाएको छ, यसपछि गाजाबाट इजरायली सेनाको फिर्ती हुनेछ।’ विज्ञप्तिको अन्त्यमा बोर्डको ध्यान अब कार्यान्वयनमा केन्द्रित रहेको उल्लेख गरिएको छ।
