जेठ २३, बुटवल । रुपन्देहीको भैरहवास्थित गौतम बुद्ध अन्तर्राष्ट्रिय विमानस्थलबाट काठमाडौँतर्फ प्रस्थान गर्ने क्रममा एक भारतीय नागरिकको साथबाट ठूलो मात्रामा भारतीय रुपैयाँ फेला परेको छ । विमानस्थल सुरक्षा जाँचका क्रममा ५९ वर्षीय भीमा श्रीनिवासको साथबाट ७ लाख ९५ हजार भारतीय रुपैयाँ बरामद गरिएको प्रहरीले जानकारी दिएको हो ।
उनी भारतको आन्ध्र प्रदेश राज्यको प्रकाशम जिल्लाका स्थायी बासिन्दा रहेको जनाइएको छ । दिउँसो करिब ३ बजेर १० मिनेटमा काठमाडौँ जान लागेको उडान नम्बर ८६० मा सवार हुने क्रममा उनको साथमा रहेको खैरो रङको हाते झोला जाँच गर्दा उक्त रकम भेटिएको हो ।
विमानस्थलको आन्तरिक टर्मिनलमा रहेको हाते सामान जाँच गर्ने एक्सरे मेसिनबाट परीक्षण गर्दा ५०० दरका १ हजार ५९० थान नोट फेला परेको बताइएको छ ।
बरामद रकमबारे आवश्यक अनुसन्धान भइरहेको सम्बन्धित निकायले जनाएको छ ।
