कात्तिक १३, काठमाडौं । राष्ट्रिय स्वतन्त्र पार्टी (रास्वपा) का संसदीय दलका सचेतक प्रकाशचन्द्र परियारले पत्रकार पक्राउ तथा धरपकड गर्ने प्रहरी शैलीप्रति आपत्ति जनाएका छन्। सामाजिक सञ्जालमा धारणा सार्वजनिक गर्दै उनले समाचारको विषयलाई लिएर पत्रकार पक्राउ गर्ने, धरपकड गर्ने र नियन्त्रणको दुष्प्रयास गर्नु घोर भर्त्सनायोग्य भएको बताएका छन्।
उनले पत्रकार विश्वमणि सुवेदी पक्राउ प्रकरण र नयाँ पत्रिकाको कार्यालयमा प्रहरी पुगेको घटनाको छानबिन गर्न सरकारसँग माग गरेका छन्।
परियारले लेखेका छन् : पुलिस स्टेट (Police State) बन्द गर:
समाचारको विषयलाई लिएर समाचार कक्षमै पुगेर पत्रकार पक्राउ,धरपकड र नियन्त्रणको दुष्प्रयासप्रति घोर भर्त्सना गर्दछु।
संविधानमै सुनिश्चित गरिएको प्रेस स्वतन्त्रताको संरक्षण र संबर्द्धन गर्ने दायित्व रहेको राज्यको शक्तिशाली संगठन प्रहरीको शैली ‘पुलिस स्टेट’ याने ‘प्रहरी राज’ उन्मुख देखियो।
पत्रकार विश्वमणी सुवेदी पक्राउ प्रकरण र नयाँ पत्रिकाको कार्यालयमा पुगेका सादा पोशाकका प्रहरी जत्थाको “जंगे शैली” लोकतान्त्रिक राज्य नेपालको सामान्य चरित्र हुँदै होईन।
विदाको मुखैमा गरिएको प्रहरीको यो हर्कत छानविनयोग्य छ, म सरकारसंग यो ‘मिडीया धरपकड प्रकरण’ को छानविनका लागि विशेष माग गर्दछु।
पत्रकार/मिडीयाको विषयलाई प्रेस काउन्सीलबाटै निरुपण गर्ने अभ्यास गर्न जोडदार माग गर्दछु।
-प्रकाशचन्द्र परियार
सचेतक
रास्वपा,संसदीय दल
२०८३/००७/१३ गते
