भदौ १०, काठमाडौं । अमेरिकी गायिका, गीतकार, अभिनेत्री, लेखिका तथा समाजसेवी डली पार्टनको ८० वर्षको उमेरमा निधन भएको छ । टेनेसीमा जन्मिएकी पार्टनको न्यासभिलमा निधन भएको उनको परिवारले जनाएको छ ।
सात दशक लामो सांगीतिक यात्रामा पार्टनले संगीतलाई नयाँ उचाइमा पुर्याउँदै विभिन्न विधाका संगीतमा आफ्नो प्रभाव विस्तार गरेकी थिइन्। ‘जोलिन’, ‘आइ विल अलवेज लभ यु’ र ‘नाइन टु फाइभ’ जस्ता उनका गीत विश्वभर चर्चित छन्। उनले आफ्नो करिअरमा करिब तीन हजार गीत लेखेकी थिइन् भने एक सय मिलियनभन्दा बढी अभिलेख बिक्री भएको जनाइएको छ । संगीतसँगै पार्टन समाजसेवाका कारण पनि विश्वभर परिचित थिइन् । उनको ‘इम्याजिनेसन लाइब्रेरी’ अभियानमार्फत बालबालिकालाई निःशुल्क पुस्तक उपलब्ध गराइँदै आएको थियो । उक्त अभियानबाट विश्वभर ३० करोडभन्दा बढी पुस्तक बालबालिकासम्म पुगेको विवरण सार्वजनिक भएको छ ।
पार्टनको प्रभाव संगीत र समाजसेवामा मात्र सीमित थिएन । उनले चलचित्रमा अभिनय गर्नुका साथै शिक्षा, बालबालिका र स्वास्थ्य क्षेत्रमा समेत ठूलो योगदान गरेकी थिइन् । कोरोना भाइरसविरुद्धको खोप अनुसन्धानका लागि उनले १० लाख अमेरिकी डलर सहयोग गरेकी थिइन् ।
उनको निधनअघि ५९ वर्षसम्मका जीवनसाथी कार्ल थोमस डिनको सन् २०२५ मा निधन भएको थियो । उनका आमाबुबा एभी ली क्यारोलिन ओवेन्स र रोबर्ट ली पार्टन वरिष्ठको पनि यसअघि नै निधन भइसकेको थियो ।
पार्टनको निधनलाई संगीत क्षेत्रले एक युगको अन्त्यका रूपमा लिएको छ। उनको संगीत, हास्यव्यङ्ग्य, सरल व्यवहार र उदारताले पुस्तौँदेखि दर्शक तथा श्रोताको मन जितेको थियो । उनले आफ्नो चम्किलो सार्वजनिक व्यक्तित्वसँगै संघर्ष, मेहनत र मानवीय संवेदनालाई पनि आफ्नो पहिचान बनाएकी थिइन् ।
उनको इच्छाअनुसार तत्काल परिवारका सदस्य मात्र सहभागी हुने गरी निजी अन्त्येष्टि कार्यक्रम गरिने परिवारले जनाएको छ ।
