असार ७, काठमाडौं । फिफा विश्वकप २०२६ अन्तर्गत समूह ‘ई’ को रोमाञ्चक खेलमा जर्मनीले आइभोरी कोस्टमाथि २-१ को पुनरागमन जित दर्ता गरेको छ। क्यानडाको टोरन्टो स्टेडियममा आइतबार बिहान सम्पन्न यस खेलमा सब्सिच्युट खेलाडी डेनिस उन्डाभ नायक बनेपछि चार पटकको विश्व विजेता जर्मनीले प्रतियोगिताको नकआउट चरण (अन्तिम ३२) मा आफ्नो स्थान पक्का गरेको हो।
खेलको सुरुवातमा आइभोरी कोस्टले जर्मनीलाई कडा चुनौती दिएको थियो। खेलको ३०औं मिनेटमा कप्तान फ्रान्क केसीले गोल गर्दै आइभोरी कोस्टलाई सुरुवाती अग्रता दिलाएका थिए। अमाद डियालोको प्रहार डिफेन्डरले रोके पनि रिबाउन्डमा आएको बललाई केसीले जाली चुमाएका थिए।
पहिलो हाफमा जर्मनीका अलेक्जेन्डर पाभ्लोभिच र काइ हाभर्ट्जले गोल गरे पनि फाउलका कारण रेफ्रीले ती गोललाई मान्यता दिएनन्, जसले गर्दा जर्मनी पहिलो हाफमा १-० ले पछि परेको थियो।
दोस्रो हाफमा जर्मन प्रशिक्षक जुलियन नागेल्सम्यानले टोलीमा केही रणनीतिक परिवर्तन गरे। खेलको ६०औं मिनेटमा मैदान प्रवेश गरेका डेनिस उन्डाभले जर्मनीको उद्धार गरे। उनले ६८औं मिनेटमा नादिम अमिरीको पासमा गोल गर्दै खेललाई १-१ को बराबरीमा ल्याए। खेल बराबरीमा सकिने अनुमान गरिएका बेला इन्जुरी समयको चौथो मिनेटमा उन्डाभले नै व्यक्तिगत दोस्रो गोल गर्दै जर्मनीलाई नाटकीय जित दिलाए। फेलिक्स न्मेचाको पासलाई नियन्त्रणमा लिँदै उनले उत्कृष्ट फिनिसिङ गरेका थिए।
यो जितसँगै जर्मनीले अघिल्लो दुई विश्वकपमा समूह चरणबाटै बाहिरिनु परेको नमीठो यादलाई बिर्सिँदै अन्तिम ३२ मा स्थान बनाएको छ। उन्डाभले जर्मनीका लागि हालसम्म ११ खेलमा ९ गोल गर्दै आफ्नो उत्कृष्ट लयलाई जारी राखेका छन्।
पराजित भए तापनि आइभोरी कोस्टको अघिल्लो चरण पुग्ने सम्भावना अझै जीवितै छ। अब उसले आफ्नो अन्तिम समूह खेलमा कुरासाओलाई पराजित गर्नुपर्नेछ।
