कैलाली। वाइ वाइ यू–१९ पुरुष सुदूरपश्चिम प्रदेशस्तरीय एकदिवसीय छनोट क्रिकेट प्रतियोगिता–२०८३ अन्तर्गत पहिलो दिनको पहिलो खेलमा कैलाली यू–१९ ले डोटी यू–१९ लाई ५४ रनले पराजित गर्दै प्रतियोगितामा विजयी सुरुवात गरेको छ। धनगढीस्थित फाप्ला क्रिकेट मैदानमा सम्पन्न खेलमा कैलालीले दिएको २१३ रनको लक्ष्य पछ्याएको डोटी १५८ रनमै समेटिएपछि कैलालीले सहज जित निकालेको हो।
प्रतियोगिताको पहिलो खेलमा टस जितेको डोटी यू–१९ ले पहिले फिल्डिङ गर्ने निर्णय गरेपछि ब्याटिङमा उत्रिएको कैलाली यू–१९ ले ४२.२ ओभरमा आफ्ना सबै विकेट गुमाउँदै २१२ रन बनाएको थियो। कैलालीका लागि विजेश चौधरीले उत्कृष्ट ब्याटिङ गर्दै १०७ बलमा ७ चौका र ३ छक्काको मद्दतले ७२ रन बनाए। त्यस्तै, टोलीका कप्तान निश्चल क्षेत्रीले ५२ बलमा ६ चौका र १ छक्कासहित ४७ रनको योगदान दिए।
स्वरूप चौधरीले ३३ बलमा ४ चौकासहित ३५ रन बनाउँदा राजदीप आचार्यले २५ बलमा १ चौकाको मद्दतले १६ रन जोडे। यी ब्याटरहरूको योगदानमा कैलालीले प्रतिस्पर्धात्मक योगफल तयार पारेको थियो।
डोटी यू–१९ का लागि बलिङतर्फ कैलाश भुलले प्रभावशाली प्रदर्शन गर्दै ८.२ ओभरमा ३८ रन खर्चेर ४ विकेट लिए। विमल नागरीले ७ ओभरमा ४४ रन दिँदै ३ विकेट हात पारे। डोटीका बलरहरूले कैलालीलाई ठूलो योगफल बनाउनबाट रोक्ने प्रयास गरे पनि कैलालीले २१२ रन जोड्न सफल भयो।
राहुल साउँदको घातक बलिङ, डोटी १५८ रनमै समेटियो
२१३ रनको लक्ष्यसहित जवाफी ब्याटिङमा उत्रिएको डोटी यू–१९ ले ३४ ओभरमा आफ्ना सबै विकेट गुमाउँदै १५८ रन मात्र बनाउन सक्यो। डोटीका लागि कैलाश भुलले २९ बलमा २ चौका र ३ छक्कासहित ३५ रन बनाए। कप्तान रोलेक्स महराले ४३ बलमा ४ चौकाको मद्दतले ३० रन जोड्दा शेरबहादुर ऐरले २७ बलमा ४ चौका र १ छक्कासहित २९ रन बनाए। त्यस्तै, अनुरागसिंह ठकुरीले ३३ बलमा ४ चौकाको मद्दतले २४ रनको योगदान दिए।
डोटीका केही ब्याटरले राम्रो प्रदर्शन गरे पनि कैलालीका बलरहरूको कसिलो बलिङसामु टोलीले लक्ष्य पूरा गर्न सकेन। कैलालीका राहुल साउँदले उत्कृष्ट बलिङ गर्दै ६ ओभरमा १ मेडेन राखेर १७ रन खर्चिँदै ५ विकेट लिए। उनको घातक बलिङ डोटीको ब्याटिङ क्रम धराशायी बनाउन निर्णायक बन्यो।
त्यस्तै, रुद्रप्रसाद आचार्यले ८ ओभरमा १ मेडेनसहित १८ रन खर्चेर २ विकेट लिए भने सुवोध तिवारीले ८ ओभरमा ३९ रन दिँदै २ विकेट हात पारे। कैलालीका बलरहरूको सामूहिक प्रदर्शनका कारण डोटी १५८ रनमा सीमित हुन पुग्यो। यससँगै कैलाली यू–१९ ले डोटी यू–१९ माथि ५४ रनको जित दर्ता गर्न सफल भयो। खेलमा बल र ब्याट दुवैबाट प्रभावशाली प्रदर्शन गरेका कैलालीका राहुल साउँद प्लेयर अफ द म्याच घोषित भए।
उद्घाटन समारोहमा क्रिकेट क्षेत्रका पदाधिकारीहरूको उपस्थिति
प्रतियोगिताको उद्घाटन समारोह सुदूरपश्चिम प्रादेशिक क्रिकेट संघका अध्यक्ष वाशुदेव जोशीको सभापतित्वमा सम्पन्न भएको थियो। कार्यक्रममा नेपाल क्रिकेट संघ (क्यान) का केन्द्रीय सदस्य विक्रम बिष्ट प्रमुख अतिथिका रूपमा उपस्थित थिए।
त्यस्तै, सुदूरपश्चिम प्रदेश खेलकुद परिषद्का सदस्य रुपेन्द्र धामी र कैलाली जिल्ला खेलकुद समितिका कार्यवाहक अध्यक्ष बेनि खड्का विशिष्ट अतिथिका रूपमा सहभागी थिए। कार्यक्रममा सुदूरपश्चिम प्रादेशिक क्रिकेट संघका सदस्य हरि रेग्मी, संघका सल्लाहकारद्वय दीपक सुरी र सतीस जोशीसहित खेलकुदप्रेमी तथा क्रिकेट क्षेत्रसँग आबद्ध विभिन्न व्यक्तित्वहरूको उपस्थिति रहेको थियो।
प्रदेशस्तरमा युवा क्रिकेट प्रतिभाको पहिचान, खेलाडीको क्षमता अभिवृद्धि तथा आगामी प्रतियोगिताका लागि योग्य खेलाडी छनोट गर्ने उद्देश्यले सञ्चालन भइरहेको यस प्रतियोगिताले सुदूरपश्चिमका युवा क्रिकेटरहरूलाई आफ्नो प्रतिभा प्रदर्शन गर्ने अवसर प्रदान गर्ने अपेक्षा गरिएको छ।
भोलि कञ्चनपुर र अछामबीच प्रतिस्पर्धा
प्रतियोगिताअन्तर्गत भोलि हुने खेलमा कञ्चनपुर यू–१९ र अछाम यू–१९ आमनेसामने हुनेछन्। दुवै टोलीबीच प्रतिस्पर्धात्मक खेल हुने अपेक्षा गरिएको छ। प्रतियोगिताको पहिलो खेलमा कैलालीले जित हासिल गरेसँगै आगामी खेलहरूमा पनि प्रदेशका विभिन्न जिल्लाका युवा टोलीबीच रोमाञ्चक प्रतिस्पर्धा हुने विश्वास गरिएको छ।
वाइ वाइ यू–१९ पुरुष सुदूरपश्चिम प्रदेशस्तरीय एकदिवसीय छनोट क्रिकेट प्रतियोगिता–२०८३ ले प्रदेशका प्रतिभाशाली युवा खेलाडीलाई आफ्नो क्षमता प्रमाणित गर्ने र छनोट प्रक्रियामा स्थान बनाउने महत्वपूर्ण अवसर प्रदान गर्नेछ।
