भदौ २५, काठमाडौं । सामाजिक विकासमन्त्री एवं कर्णाली खेलकुद विकास परिषद्का अध्यक्ष माननीय जीतबहादुर मल्लको अध्यक्षतामा कर्णाली खेलकुद विकास परिषद्को २३औँ बोर्ड बैठक सम्पन्न भएको छ। वि.सं. २०८३ भदौ २४ गते सम्पन्न बैठकले कर्णाली प्रदेशमा आयोजना हुन गइरहेको १०औँ राष्ट्रिय खेलकुद प्रतियोगितालाई लक्षित गर्दै महत्वपूर्ण निर्णयहरू गरेको छ।
बैठकले आगामी मंसिर १६ गतेदेखि २७ गतेसम्म कर्णाली प्रदेशमा सञ्चालन हुने १०औँ राष्ट्रिय खेलकुद प्रतियोगिताका लागि कर्णाली प्रदेश पूर्ण रूपमा तयार रहेको निष्कर्ष निकालेको छ। प्रतियोगिता सञ्चालनका लागि आवश्यक तयारी, व्यवस्थापन तथा समन्वयलाई प्रभावकारी बनाउँदै प्रदेशलाई राष्ट्रिय खेलकुदको महत्वपूर्ण केन्द्रका रूपमा प्रस्तुत गर्ने विषयमा समेत बैठकमा छलफल भएको जनाइएको छ।
त्यसैगरी, राष्ट्रिय खेलकुद परिषद् (राखेप) ले निर्धारण गरेका खेल विधा तथा तोकिएको मितिअनुसार प्रतियोगिता सञ्चालन गर्न कर्णाली प्रदेशले आवश्यक सहयोग, समन्वय र व्यवस्थापनका लागि आफूलाई तयार राख्ने निर्णय गरेको छ।
बैठकले शिक्षा तथा खेलकुद मन्त्रालय र राष्ट्रिय खेलकुद परिषद्समक्ष कर्णाली प्रदेश सह–आयोजकका रूपमा पूर्ण रूपमा तयार रहेको प्रतिबद्धता जनाउने निर्णयसमेत गरेको छ। प्रतियोगितालाई निर्धारित समयसीमा, मापदण्ड र आवश्यक व्यवस्थापनअनुसार सफलतापूर्वक सम्पन्न गर्न प्रदेश सरकार, मन्त्रालय, परिषद् तथा सम्बन्धित निकायबीच प्रभावकारी समन्वय आवश्यक रहेको विषयलाई बैठकले प्राथमिकतामा राखेको छ।
कर्णालीमा हुन लागेको १०औँ राष्ट्रिय खेलकुद प्रतियोगिता प्रदेशको खेलकुद विकास, खेल पूर्वाधारको उपयोग तथा खेलाडीको क्षमता प्रदर्शनका दृष्टिले महत्वपूर्ण अवसरका रूपमा हेरिएको छ। प्रतियोगितामार्फत कर्णाली प्रदेशले राष्ट्रियस्तरमा आफ्नो खेलकुद क्षमता प्रस्तुत गर्नुका साथै स्थानीय खेलाडीलाई समेत ठूलो मञ्च उपलब्ध हुने अपेक्षा गरिएको छ।
प्रतियोगिता सफल बनाउन खेलस्थलको तयारी, खेल सामग्री तथा प्राविधिक व्यवस्थापन, खेलाडी तथा टोलीको व्यवस्थापन, सुरक्षा, स्वास्थ्य, यातायातलगायतका पक्षमा सम्बन्धित निकायबीच समन्वयलाई थप मजबुत बनाउनुपर्ने आवश्यकता देखिन्छ। परिषद्को पछिल्लो निर्णयले भने कर्णाली प्रदेश प्रतियोगिता आयोजनाका लागि आवश्यक तयारीमा अघि बढिरहेको स्पष्ट संकेत गरेको छ।
मंसिर १६ देखि २७ गतेसम्म सञ्चालन हुने १०औँ राष्ट्रिय खेलकुद प्रतियोगितालाई भव्य, व्यवस्थित र सफल बनाउन कर्णाली प्रदेशले सह–आयोजकका रूपमा आफ्नो भूमिका प्रभावकारी ढंगले निर्वाह गर्ने प्रतिबद्धता जनाएको छ।
