जेठ २०, काठमाडौँ । इरानले कुवेतमा रहेको अमेरिकी सैन्य आधारमा आक्रमण गरेको छ । बुधबार बिहान कुवेती सेनाले आफ्नो वायु प्रतिरक्षा प्रणालीले मिसाइल र ड्रोन आक्रमणहरू रोकेको जनाएको छ । कुवेती सेनाले विस्फोटका आवाजहरू वायु प्रतिरक्षा प्रणालीले आक्रमण रोक्दा उत्पन्न भएको बताउँदै नागरिकलाई सुरक्षा निर्देशिका पालना गर्न आग्रह गरेको छ ।
यद्यपि, इरानी इस्लामिक रिभोलुसनरी गार्डले तीनवटा मिसाइलले कुवेतस्थित अमेरिकी सैन्य अड्डामा सफल प्रहार गरेको दाबी गरेको छ ।
यसअघि सोमबार पनि कुवेतले मिसाइल र ड्रोन आक्रमण विफल पारेको जनाएको थियो । त्यसबेला अमेरिकी केन्द्रीय कमान्डले कुवेतमा रहेका अमेरिकी फौजलाई लक्षित दुई इरानी ब्यालिस्टिक मिसाइल सफलतापूर्वक अवरोध गरिएको र कुनै क्षति नभएको बताएको थियो ।
बुधबार बिहान नै बहराइनमा पनि साइरन बजाइएको छ । बहराइनको गृह मन्त्रालयले नागरिकलाई शान्त रहन र सुरक्षित स्थानमा जान आग्रह गरेको छ । त्यसैबीच इरानले अमेरिकी सेनाले प्रयोग गर्ने कुवेतका दुई वायुसेना अड्डालाई निशाना बनाएको दाबी गरेको छ ।
अमेरिकी केन्द्रीय कमान्डका अनुसार इरानले मध्यपूर्वभरि आक्रमणको प्रयास गरेपछि आत्मरक्षाका लागि इरानको किश्म टापुस्थित सैन्य नियन्त्रण केन्द्रमा प्रहार गरिएको हो । अमेरिकाले इरानबाट कुवेततर्फ प्रक्षेपण गरिएका दुई मिसाइल लक्ष्यमा नपुगी बीचमै खसेको वा टुक्रिएको तथा बहराइनतर्फ प्रहार गरिएका तीन मिसाइल अमेरिकी र बहराइनी वायु प्रतिरक्षाले तत्काल खसालेको जनाएको छ ।
इरानी इस्लामिक रिभोलुसनरी गार्डले भने किश्म टापुमाथिको अमेरिकी आक्रमणको जवाफस्वरूप कुवेततर्फ कम्तीमा १० ब्यालिस्टिक मिसाइल प्रहार गरिएको दाबी गरेको छ। उसले यसलाई प्रारम्भिक प्रतिक्रिया भन्दै अझ कडा प्रतिकारात्मक आक्रमण हुन सक्ने चेतावनी दिएको छ ।
