पौष १८, काठमाडौं । नेपाली काँग्रेसका महामन्त्री विश्वप्रकाश शर्माले पार्टी नफुट्ने प्रतिक्रिया दिएका छन् । केन्द्रीय कार्यसम्पादन समिति बैठकमा भाग लिने क्रममा पार्टी केन्द्रीय कार्यालय सानेपामा सञ्चारकर्मीसँग कुरा गर्दै महामन्त्री शर्माले आफूहरूले विधानअनुसार नै विशेष महाधिवेशन आह्वान गरेको बताउदै पार्टी नफुट्ने बताएका हुन् ।
उनले भने- ‘नेपाली कांग्रेस फुट्दैन, एकढिक्का रहन्छ । कांग्रेस फुट्छ भन्ने कसैमा आशंका छ भने नराखे हुन्छ । यो परिस्थितिमा नयाँ नेतृत्वसहित नै चुनावमा जाने कुरा हुनुपर्ने हो । त्यसैले निर्धारित समयमा गर्न सकिएन । विकल्पका रूपमा विशेष महाधिवेशन नै हो ।’
उनले संस्थागत रूपमै विशेष महाधिवेशनका बारेमा केन्द्रीय समिति र कार्यसम्पादन समितिले निर्णय गरोस् भन्ने आफूहरूले चाहेको बताए ।
महामन्त्री शर्मा र अर्का महामन्त्री गगन थापाले विहिबार नियमित महाधिवेशन स्थगन गर्दै विशेष महाधिवेशन आव्हान गरेका थिए । विशेष महाधिवेशन पक्षधरले पुस २७ र २८ मा महाधिवेशन गर्न भृकुटीमण्डपमा हल बुक समेत गरेर अगाडी बढेको अवस्थामा आज शुरु भएको काँग्रेस केन्द्रीय कार्यसम्पादन समितिको बैठकलाई महत्व दिएर हेरिएको छ ।
