भदौ १६, काठमाडौं । ७८ वर्षीय धनपति भण्डारीले रसुवाका बाढीपीडितका लागि ७ लाख ७७ हजार ७७७ रुपैयाँ सहयोग गरेका छन् । उनले सिंहदरबार पुगेर उनले अर्थमन्त्री डा. स्वर्णिम वाग्लेलाई सहयोग रकमको चेक हस्तान्तरण गरेका थिए ।
जीवनको लामो समय भारतमा रोजगारीका क्रममा बिताएका भण्डारी छोराछोरी हुर्किएपछि आफ्नो थातथलो बुटवल फर्किएका थिए । छोराछोरीले काठमाडौँमा राम्रो व्यवस्था गरेपछि उनी बुटवलबाट काठमाडौँ सरेर सिनामङ्गलमा बस्दै आएका छन् । मुलुकमा ठूलो संकट आइपर्दा उनले आफ्नै खाताबाट चेक काटेर सरकारलाई सहयोग गर्दै आएका छन्। यसपटकको सहयोगसहित उनले सरकारलाई गरेको यो तेस्रो सहयोग हो ।
उनले यसपटक पनि ७ लाख ७७ हजार ७७७ रुपैयाँको चेक हस्तान्तरण गरेका हुन्। सहयोग रकममा ७ लाख ७७ हजार ७७७ को अनौठो संयोग रहे पनि यसको कारण भने खुलाइएको छैन । चेक बुझ्दै अर्थमन्त्री वाग्लेले सहयोग रकम गलत ठाउँमा प्रयोग नहुने प्रतिबद्धता जनाएका थिए । उनले उक्त रकम रसुवाका बाढीपीडितको हितमा खर्च हुने र जिल्लाका स्थानीय तहमा सिधै पठाइने बताएका थिए ।
प्रधानमन्त्री बालेन्द्र शाहले सोमबार साँझ सामाजिक सञ्जालमार्फत दिएको जानकारीअनुसार प्रधानमन्त्री राहत कोषका लागि सोमबार दिउँसोसम्म ६ अर्ब ३६ करोड रुपैयाँभन्दा बढी रकम जम्मा भएको छ ।
