मंसिर १४, काठमाडौं । नेपाली कांग्रेसभित्र डेढ महिनादेखि जारी अनिश्चितता अन्त्य हुने सङ्केत देखिएको छ । उक्त कुराबारेको जानकारी एक नेताले दिएका हुन् । १५औँ महाधिवेशनको तालिका र समयसीमाबारे सहमति खोज्ने प्रयास तीव्र भइरहेका बेला केन्द्रीय सदस्य कल्याण गुरुङले नेतृत्वबीच शनिबार भद्र सहमति बनेको दाबी गरेका छन् ।
गुरुङका अनुसार सभापति शेरबहादुर देउवा र कार्यवाहक सभापति पूर्णबहादुर खड्काको पहलमा १५औँ महाधिवेशन २०८२ साल पुस मसान्तभित्र सम्पन्न गर्ने सहमति भएको छ । उनले दुवै नेताको लचकता र प्रयासका कारण महाधिवेशन कार्यतालिका अब चाँडै सार्वजनिक हुने अपेक्षा व्यक्त गरेका छन् ।
सहमतिको मुख्य बुँदा–
– महाधिवेशन २०८२ साल पुस मसान्तभित्र सम्पन्न गर्ने ।
– त्यही अवधिभित्र विस्तृत कार्यतालिका ल्याउने
– केन्द्रीय क्रियाशील छानबिन समितिसहित आवश्यक संरचनाहरू गठन गर्ने ।
– निर्वाचन प्रक्रियालाई केन्द्रीकृत गर्दै समन्वय समितिहरू बनाउने ।
गुरुङले महाधिवेशन वैशाखमा गर्नुपर्ने धारणा धेरैमा भए पनि नेतृत्वले निकालेको सहमतिलाई आफूले स्वीकार र स्वागत गर्ने बताए।
पार्टीभित्रका सबै धारणा हालका लागि थाती राखेर पुस मसान्तभित्र महाधिवेशन सम्पन्न गर्ने निर्णयलाई साथ दिन उनले अपिल गरे ।
यस प्रक्रियामा सहयोग गरेको भन्दै उपसभापति, महामन्त्री, सहमहामन्त्री, पूर्वपदाधिकारी, नेता डा. शेखर कोइराला र केही केन्द्रीय सदस्यलाई उनले धन्यवाद दिएका छन् ।
कांग्रेसमा १५औँ महाधिवेशनको कार्यतालिका सार्वजनिक हुने समय नजिकिँदै गर्दा अन्तिम सहमतिले कस्तो मोड लिन्छ भन्ने चासो थपिएको छ ।
