माघ २,काठमाडौँ ।विमल घर्ती मगरले दुई गोल गर्नुका साथै एक असिस्ट गरेपछि लिग लिडर मछिन्द्र एफसीले शहीद स्मारक ए डिभिजन लिगमा आइतबार ब्रिगेड ब्वाइज क्लबलाई ४:० ले पराजित गरेको छ ।
यो जितले साविक विजेता मछिन्द्रले दोस्रो स्थानको मनाङ मर्स्याङ्दीमाथि ४ अंकको स्पष्ट अग्रता समेत बनाएको छ र उपाधि होडलाई अझ बलियो बनाएको छ । मछिन्द्रको ९ खेलबाट २३ अंक भएको छ । समान खेलबाट मनाङको १९ अंक छ । पाँचौ हार बेहोरेको ब्रिगेड भने रेलिगेसन जोनबाट १ अंक मात्र सुरक्षित छ र ६ अंकका साथ १२औं स्थानमा छ ।
यसै खेलमा मछिन्द्रका दुई खेलाडी अभिषेक रिजाल र रेजिन सुब्बाले समेत लिगमा गोलको खाता खोले । यस सिजन लिगमा रेजिनको यो पहिलो खेल समेत हो ।त्रिपुरेश्वरस्थित दशरथ रंगशालमा भएको खेलमा ब्रिगेडले पहिलो हाफमा मछिन्द्रलाई गोलरहित बराबरीमा रोकेको थियो । ब्रिगेडका गोलकिपर गुरप्रित सिंहले केही राम्रो बचाउ गर्दा मछिन्द्रले पहिलो हाफमा गोल गर्न सकेको थिएन ।
तर दोस्रो हाफमा विमल नायक बने । उनले ५६औं र ६२औं मिनेटमा गोल गर्दै मछिन्द्रलाई २:० को अग्रता दिलाए । ब्रिगेड विरुद्ध दुई गोलपछि लिगमा विमलको गोलसंख्या ३ पुगेको छ ।
त्यसपछि ८४औं मिनेटमा विमलको क्रसमा रेजिनले गोल गर्दै मछिन्द्रको अग्रता बढाए । विमलको दोस्रो गोलमा रेजिनले नै सहयोग गरेका थिए ।मछिन्द्र यतिमै रोकिएन । इन्जुरी टाइममा अभिषेकरले पनि गोल गरेपछि मछिन्द्रले सहज जित हात पार्यो । पहिलो हाफमा डिफेन्समा मजबुत देखिएको ब्रिगेड मछिन्द्रसामु दोस्रो हाफमा निरिह बनेको थियो ।
