• २०८१ साउन ८ गते मङ्गलवार

नेपालमा लायन्स क्लबको योगदान महत्वपूर्ण : राष्ट्रपति विद्यादेवी भण्डारी

खबर२४ नेपाल पढ्न लाग्ने समय : २ मिनेट

जेठ ३०, काठमाडौँ । राष्ट्रपति विद्यादेवी भण्डारीले नेपालमा लायन्स क्लबले स्वास्थ्य, शिक्षा र प्राकृतिक विपद्का क्षेत्रमा गरेको योगदान महत्वपूर्ण रहेको बताएकी छन । राष्ट्रपति कार्यालय शीतल निवासमा लायन्स क्लब अफ इन्टरनेसनलले आज आयोजना गरेको अभिनन्दन तथा सम्मान कार्यक्रममा क्लबले नेपालको अस्पताल, विद्यालय र बालगृह सञ्चालनमा पुर्‍याएको योगदानको चर्चा गरिन ।

“नेपालमा लायन्स क्लबले अस्पताल, विद्यालय, बालगृह लगायत सञ्चालन गरिरहेको छ”, राष्ट्रपति भण्डारीले भनिन , “यस्ता परियोजना सञ्चालन गर्दा न्यून प्रशासनिक खर्च लाग्ने गरेको सुन्दा खुशी लागेको बताइन ।” कृषिमा व्यवसायीकरण र आधुनिकीकरण गर्न राज्यले ध्यान दिइरहेको र देशलाई रोजगार तथा आत्मनिर्भर बनाउन सामाजिक संस्थाको ठूलो भूमिका रहेको उल्लेख गरिन ।

राष्ट्रपति भण्डारीले भूकम्प, बाढीपहिराजस्ता समस्याले वर्षाको समयमा ठूलो धनजनको क्षति पुर्‍याउने गरेको हुँदा राज्यका साथसाथै सामाजिक संस्थाले पनि प्रकोप न्यूनीकरणमा सहयोग गर्नुपर्ने बताइन । उक्त समारोहमा क्लबले राष्ट्रपति भण्डारीलाई अभिनन्दन गरेको थियो।कार्यक्रममा लायन्स क्लबले नेपालमा गरेको कामको विषयमा वृत्तचित्र समेत प्रस्तुत गरेको थियो।

वृत्तचित्रमा आखाँ अस्पताल निर्माण, भूकम्पपछि १८ सामुदायिक विद्यालय निर्माण गरेर समुदायमा हस्तान्तरण तथा त्रिभुवन विश्वविद्यालयसँग सहकार्य गरी बल्ड बैंक स्थापना गर्ने तयारी भइरहेको जस्ता विषय समेटिएका थिए। सो अवसरमा क्लबका संस्थापक मूलचन्द राठी र किसनलाल दुगडलाई सम्मान गरिएको थियो। यस्तै प्रजातन्त्र ल्याउन १०० तोला सुन दिएर सहयोग गरेकी इन्दुदेवी नौखलाई पनि सो अवसरमा राष्ट्रपति भण्डारीले सम्मान गरिन ।

कार्यक्रममा समाजसेवीत्रय नन्दकिशोर राठी, मुकुन्दराज पाण्डे र शेषनारायण श्रेष्ठ पनि राष्ट्रपति भण्डारी द्वारा सम्मानित भएका थिए ।लायन्स क्लब अन्तराष्ट्रीय डिस्ट्रिकट ३२५ ए १ का गभर्नर रेवतबहादुर कार्कीले नेपालमा शिक्षा, स्वास्थ्य र प्राकृतिक प्रकोपको क्षेत्रमा सक्दो सेवा गर्ने प्रयास गरिरहेको र आगामी दिनमा पनि प्रयास जारी रहने बताए ।नेपालमा पहिलो पटक सन् १९७१ मा लायन्स क्लब अफ विराटनगरका नाममा पूर्वप्रधानमन्त्री स्व मात्रिकाप्रसाद कोइरालाको नेतृत्वमा स्थापना भएको थियो।

अहिले नेपालमा करिब दुई हजार क्लब स्थापना भइसकेका छन्। लायन्स क्लबको मुख्य उद्देश्य समाज सेवा गर्ने हो। क्लबले खासगरी शिक्षा, स्वास्थ्य र प्राकृतिक विपद्को समयमा सहयोग गर्दै आएको छ।

प्रतिक्रिया दिनुहोस