फगुन १, काठमाडौं । राष्ट्रपति विद्यादेवी भण्डारी र कांग्रेस नेता शेखर कोइरालाबीच आइतबार भेटवार्ता भएको छ । राष्ट्रपति भण्डारीलाई भेट्न कोइराला राष्ट्रपति निवास शितलनिवास पुगेका थिए । नेता कोइरालाले राष्ट्रपति भण्डारीसँग समसामयिक राजनीतिक विषयहरूमा कुराकानी भएको बताए ।
‘मुलुकको राजनीति गम्भीर अवस्थामा छ । संविधानका कतिपय व्यवस्थाहरूको कार्यान्वयन चुनौतीपूर्ण छ । संघीयताको दिगो व्यवस्थापन, प्रदेशहरूको विकास र तीन तहको निर्वाचनलगत्तै सम्पन्न गर्नुपर्ने अवस्था छ,’ नेता कोइरालाले भने, ‘वास्तवमा अहिलेको समस्याहरूमा राजनीतिक दलहरू गम्भीर भएर अघि बढ्नुपर्ने आवश्यकता देखिएको छ । राष्ट्रपतिज्यूसँग यिनै विषयहरूमा कुराकानी भयो ।’
राष्ट्रपति भण्डारीले दलहरूले आपसी सद्भाव र सहकार्यको माध्यमबाट समस्याहरूको समाधान गर्दै संविधानको कार्यान्वयन गर्ने दिशामा अघि बढ्नुपर्ने बताएकी छन् ।
