पुस २२, काठमाडौँ। ‘तीन सयौँ पृथ्वी जयन्ती तथा राष्ट्रिय एकता दिवस–२०७८’ विविध कार्यक्रम गरी पुस २७ गते मनाउने सिलसिलामा नेपाल एकीकरणमा गोर्खाली सेनाले प्रयोग गरेको पदमार्गमा ‘एकीकरण पदयात्रा’ सुरु भएको छ ।
गोरखाबाट सुरु भएको पदयात्रा धादिङ, नुवाकोट हुँदै काठमाडौँको हनुमान ढोकामा पुस २६ गते आइपुग्ने छ । नेपालको राष्ट्रिय झण्डा, नेपाली सेना पुराना युनिटका झण्डा र टर्चसहित गोरखमा तैनाथ रिपुमर्दनी गणबाट ऐतिहासिक पोशाक तथा परम्परागत बाजागाजासहित खटिएको टोलीले पदयात्रा कार्यक्रम आरम्भ गरेको सैनिक जनसम्पर्क तथा सूचना निर्देेशनालयले जनाएको छ ।
मध्य कमाण्ड सेनापति उपरथी बाबुराम श्रेष्ठ, गोरखा नगरपालिकाका नगर प्रमुख, उप–प्रमुख, प्रमुख जिल्ला अधिकारी, बाहिनीपति, जिल्लास्थित सुरक्षा निकायका प्रमुख, राष्ट्रिय सेवादलमा आबद्ध छात्रछात्रासमेत सुभारम्भ कार्यक्रममा सहभागी हुनुहुन्थ्यो ।
पदयात्रा टोलीले धादिङमा तैनाथ फौजलाई, धादिङले नुवाकोटलाई, नुवाकोटले नागार्जुनमा फौजलाई र नागार्जुन फौजले हनुमानढोकामा तैनाथ फौजलाई टर्चसहितका सामग्री हस्तान्तरण गर्नेछ । उक्त पदयात्रा पुस २७ मा राष्ट्रनिर्माताको जयन्ती तथा राष्ट्रिय एकता दिवसका दिन जङ्गी अड्डामा आयोजना हुने विशेष समारोहमा सहभागी हुने सेनाले जानकारी दिएको छ ।
