• २०८० फाल्गुन २१ गते सोमवार

हाइयर कमाण्ड तथा म्यानेजमेन्ट तालिममा महासेनानी गुरुङ सर्वाेत्कृष्ट

खबर२४ नेपाल पढ्न लाग्ने समय : १ मिनेट

पौष १६, काठमाडौं । प्रधान सेनापति महारथी प्रभुराम शर्माले तालिमले कमाण्ड तहको जिम्मेवारी पूरा गर्न सक्षम, प्रभावकारी एवं भविष्यमुखी नेतृत्वको विकासमा अहम् भूमिका निर्वाह गर्ने बताउनुभएको छ । नगरकोटस्थित नेपाली सैनिक बार कलेजमा सञ्चालन भएको दशौँ समूहको हाइयर कमाण्ड तथा व्यवस्थापनसम्बन्धी तालिमको आज जङ्गी अडडमा समापन गर्दै उहाँले शिक्षार्थीलाई रणनीतिक तथा अपरेसनल तहका नेतृत्वकर्ता, योजनाकार र सल्लाहकारका रूपमा समेत सक्षम बनाउने विश्वास व्यक्त गर्नुभयो ।

दुई महिला सैनिक अधिकृतसहित ३५ महासेनानीको सहभागिता रहेको उक्त तालिम गत भदौ १३ गते सुरु भएको थियो । उक्त तालिममा महासेनानी सुरज गुरुङ प्रथम हुनुभयो भने महासेनानी विमलकुमार बस्नेतको शोधपत्र उत्कृष्ट भएको सैनिक जनसम्पर्क तथा सूचना निर्देशनालयले जनाएको छ । हाइयर कमाण्ड तथा म्यानेजमेन्ट तालिम सेनामा सञ्चालन हुने सबैभन्दा उच्चस्तरको तालिम हो ।

विसं २०७१ देखि नगरकोटस्थित सैनिक बार कलेजमा सञ्चालन हुँदै आएको यस तालिममा उक्त कलेजबाट हालसम्म नौ महिला सैनिकसहित जम्मा २७२ जना अधिकृत दीक्षित हुनु भएको छ ।

प्रतिक्रिया दिनुहोस