असार १०, काठमाण्डौ । प्रहरीले विभिन्न पशुपंक्षीको आवाज निकालेर युट्यूबमा भाइरल भएकी सन्तोषी सुब्बाको हत्या अभियोगमा पक्राउ परेका एकजनालाई सार्वजनिक गरेको छ । महानगरीय अपराध महाशाखाले पत्रकार सम्मेलन गरी सुब्बाको हत्या अभियोगमा पक्राउ परेका सुरेश तिमल्सिनालाई सार्वजनिक गरेको हो ।
प्रहरीका अनुसार सुब्बाले बलात्कारको प्रतिवाद गर्दा उनको हत्या गरिएको हो । महाशाखका प्रमुख एसएसपी चन्द्रकुबेर खापुङसहितको टोली दक्षिणकाली पुगेर अनुसन्धान थालेको थियो । विशेष खालको कुकुरसहित त्यहाँ पुगेको टोलीले हत्याको अभियोगमा तिमल्सिनालाई पक्राउ गरी सार्वजनिक गरेको हो ।
