साउन ३, काठमाडौं । प्रहरीले बर्दिया मधुवन नगरपालिका-३ कोठियाघाटबाट १९ थान नियन्त्रित लागूऔषध नाइट्रेजेपाम सहित २ जनालाई शनिबार साँझ प्रहरीले पक्राउ गरेको छ । पक्राउ पर्नेहरुमा राजापुर नगरपालिका-८ भिमापुर बस्ने २४ वर्षीय मिलन परियार र सोही ठाउँ बस्ने २२ वर्षीय अर्जुन भुल रहेका छन् ।
गुलरियाबाट राजापुरतर्फ जाँदै गरेको से.४ प ३९११ नम्बरको मोटरसाइकललाई प्रहरी चौकी कोठियाघाटबाट खटिएको प्रहरीले जाँच गर्ने क्रममा उक्त लागूऔषध सहित फेला पारी मोटरसाइकल चालक मिलन र मोटरसाइकलमा सवार अर्जुनलाई पक्राउ गरेको हो ।
यस्तै कैलाली भजनी नगरपालिका-८ सुनाफाटास्थित सडकमा से.२ प ८५० नम्बरको मोटरसाइकलबाट ५ सय मिलिग्राम अवैध लागूऔषध ब्राउनसुगर जस्तो देखिने पदार्थ सहित २ जनालाई आइतबार बिहान प्रहरीले पक्राउ गरेको छ । पक्राउ पर्नेहरुमा धनगढी उपमहानगरपालिका(८ बस्ने २६ वर्षीय दिनेश सुनार र टिकापुर नगरपालिका(१ शंकरपुर बस्ने २० वर्षीय राजेन्द्र रेग्मी रहेका छन् । उक्त मोटरसाइललाई ईलाका प्रहरी कार्यालय भजनीबाट खटिएको प्रहरीले जाँच गर्दा उक्त लागूऔषध सहित फेला पारी उनीहरुलाई पक्राउ गरेको हो । यस सम्बन्धमा प्रहरीले थप अनुसन्धान गरिरहेको छ ।
