बैशाख २७, एजेन्सी । स्पेनिस ला लिगा फुटबलमा रियल मड्रिड बराबरीमा रोकिएको छ । आइतबार राति भएको खेलमा रियल सेभियासँग २-२ गोलको बराबरीमा रोकिएको हो ।
रियलको अस्थाई मैदानमा फेर्नान्डोको गोलबाट २२ औं मिनेटमा सेभियाले अग्रता बनाएको थियो तर, खेलको ६७ औं मिनेटमा मार्को एसेन्सियोले गोल गर्दै रियललाई १-१ गोलको बराबरीमा फर्काए । खेलको ७८ औं मिनेटमा इभान राकिटिकले पेनाल्टीमा गोल गर्दै सेभियालाई २-१ को अग्रता दिलाए । तर, खेलको इन्जुरी समयको चौंथो मिनेटमा इडेन हाजार्डले गोल गर्दै खेल २-२ को बराबरीमा ल्याउदै रियललाई हारबाट जोगाए ।
यस बराबरीसँगै रियलले शीर्ष स्थानमा उक्लने मौका गुमाएको छ । तर, रियल लिगको दोस्रो स्थानमा भने उक्लिएको छ । रियलले ३५ खेलमा ७५ अंक जोडेको छ । शीर्ष स्थानको एट्लेटिको मड्रिडको ७७ अंक रहेको छ । सेभिया ७१ अंक जोडेर चौंथो स्थानमा रहेको छ ।
