माघ १५, हेटौडा । प्रहरी भ्यानलाई बसले ठक्कर दिदाँ प्रहरी इन्स्पेक्टरसहित पाँच जना घाइते भएका छन् । गाँजा तस्करलाई पक्राउ गरी ल्याउँदै गरेको वडा प्रहरी कार्यालय हेटाडाको ना१झ १४१७ नम्बरको प्रहरीलाई भ्यानलाई काँकडभिट्टाबाट धनगढीका लागि जाँदै गरेको ना५ख ५५८२ नम्वरको बसले ठक्कर दिएको हो ।
लागूऔषध तस्कर पक्राउ गरेर हेटौंडा–११, थानाभर्याङबाट जिल्ला प्रहरी कार्यालतर्फ आउँदै गरेको बेला भ्यानलाई बसले ठक्कर दिएको हो । दुर्घटनामा प्रहरी इन्स्पेक्टर ईश्वरी प्रसाद भण्डारीसहित प्रहरी हवल्दार नरबहादुर राई, सुक्रराज खत्री, प्रहरी जवान मुन्द्र श्रेष्ठ र सुरेश कुमाल तथा एक जना गाँजा तस्कर भारतीय नागरिक ४५ वर्षीया जाहेरा खातुन घाइते छन् ।
प्रहरी निरीक्षक भण्डारीको टाउकोमा चोट लागेको छ भने अन्य सामान्य घाइते रहेको प्रहरीले जनाएको छ । घाइते प्रहरीको चुरेहिल अस्पतालमा उपचार भइरहेको छ । मकवानपुर प्रहरीले बस चालकलाई नियन्त्रणमा लिएर अनुसन्धान गरिरहेको छ ।
