पौष ८, एजेन्सी। अर्जेन्टाइन फुटबल स्टार खेलाडी लियोनल मेस्सीले विश्वकै लिजेन्ड खेलाडी ब्राजिलियन पेलेको कीर्तिमान तोडेका छन् । स्पेनिस क्लब बार्सिलोनाका कप्तान मेस्सीले एकै क्लबबाट खेल्दै पेलेको ६ सय ४३ गोलको कीर्तिमान तोडेका हुन् । मंगलबार राति स्पेनिस ला लिगाको खेलमा रियल भालाडोलिडमाथि ३-० को सहज जित निकाल्दा मेस्सीले एक गोल गरे ।
यो गोलसँगै मेस्सीले पेलेको कीर्तिमान तोड्न सफल भएका हुन् । मेस्सीले अहिलेसम्म बार्सिलोनाको लागि ६ सय ४४ गोल गरिसकेका छन् । मेस्सीले सन् २००५ मा बार्सिलोनाका लागि पहिलो गोल गरेका थिए । पेलेले सन् १९५६ देखि १९७४ सम्म १९ सिजन ब्राजिलियन क्लब सान्तोषबाट खेल्दै ६ सय ४३ गोल गरेका थिए ।
मेस्सीले बार्सिलोनाका लागि १० लिग उपाधि, ४ च्याम्पियन्स लिग उपाधिसहित ३४ मुख्य उपाधि जितेका छन् । उनले सर्वाधिक ६ वटा बालोन डि ओरको उपाधि पनि जितेका छन् ।
