• २०८१ जेष्ठ ९ गते बुधवार

‘चिहानको हड्डी फुकेर कुनै संस्था फर्किन्न’

पढ्न लाग्ने समय : ३ मिनेट

भदौ २ काठमाडौँ । प्रधानमन्त्री केपी शर्मा ओलीले सङ्घीय लोकतान्त्रिक गणतन्त्रको नयाँ अभ्यास पूर्ण र परिपक्व रूपमा कार्यान्वयनमा नआउँदै कतिपय अवाञ्छित तत्वहरू कमजोर बनाउन सक्रिय रहेको बताउनुभएको छ । प्रतिनिधिसभामा विशेष समय लिएर सम्बोधन गर्दै उहाँले संविधानसम्मत र संवैधानिक दायराका विषयलाई सरकारले सम्मान गरे पनि प्रणाली उल्ट्याउँछु भन्ने विषय सरकारलाई मान्य नहुने बताउनुभएको हो ।

pm sansad

प्रणाली उल्ट्याउने सपना देख्ने तत्व सफल नहुने प्रधानमन्त्रीले स्पष्ट पार्नुभयो । केही प्रतिगामी तत्व सडकमा आउँदैमा सरकार जिम्मेवारीबाट नभाग्ने पनि उहाँले बताउनुभयो । उहाँले भन्नुभयो, “जुन संस्था र शक्तिहरूको कुरा गर्छन् मानिसहरू, ती शक्तिहरू ज्यूँदै हुँदा हामीले ठेगान लगाएका हौँ । अहिले चिहानमा गएर हड्डी फुकेर त्यो संस्था फर्काउँछु भनेर परिकल्पना गरेर उफ्रिएको देखिन्छ । बेमौसमको यो बाजा नबजाए हुन्थ्यो । सरकारले यो उदारता देखाएको नपत्याएर हो । पत्याएका दिन संविधानको, प्रणालीको, व्यवस्थाको, लोकतन्त्रको र गणतन्त्रको रक्षाका लागि सरकार मैदानमा उत्रिन्छ । त्यसको रक्षा र कार्यान्वयन गर्छ । जनताले दिएको म्यान्डेट यही हो ।”

सम्बोधनमा प्रधानमन्त्री ओलीले सरकारको उदारता र संयमतालाई हेरेर केही तŒव बढ्तै हौसिएको टिप्पणी गर्नुभयो । प्रधानमन्त्री ओलीले संविधान, लोकतन्त्र, गणतन्त्र, सङ्घीयता जनताको शासनविरोधी क्रियाकलाप सरकारको उदारता र सहिष्णुताबाट मात्र प्राप्त भइरहेको भन्दै त्यस्ता क्रियाकलाप सञ्चालन गर्ने तŒवलाई नहौसिन चेतावनी पनि दिनुभयो ।

प्रधानमन्त्री ओलीले स्पष्ट पार्नुभयो, “अहिलेको सरकारको उदारता र संयमतालाई हेरेर केही तŒव बढ्तै हौसिएको देखिन्छ । संविधानसम्मत ढङ्गले चल्ने कुरामा संवैधानिक दायरामा चल्ने कुरामा यो सरकार प्रसन्नतापूर्वक विरोध र आलोचनाको स्वागत गर्छ । तर, सरकारको आलोचनाका नाममा प्रणाली उल्ट्याउँछु भन्ने, प्रतिगमन गर्छु भन्ने, संविधान अस्वीकार गर्छु भन्ने कुरा सरकारलाई मान्य हुन सक्दैन । त्यस्ता क्रियाकलाप सञ्चालन गर्ने तŒव नहौसिए हुने हो ।”

प्रधानमन्त्री ओलीले जनअभिमत लत्याएर वर्तमान सरकार कुनै पनि बाटोमा नजाने बताउनुभयो । लोकतान्त्रिक अभ्यास र जनमतबाट निर्मित सरकार अधिनायकवादतर्फ जान्छ भन्ने विषय जनताले नै नपत्याउने उहाँको भनाइ छ । वर्तमान सरकार जनताको ‘फ्रस्टेसन’ र तात्कालिक सेन्टिमेन्टका आधारमा नभई लोकतान्त्रिक पद्धतिबाट चुनिएको बताउँदै सरकारको निष्ठामा अनावश्यक भ्रम नछर्न पनि उहाँले चेतावनी दिनुभयो ।
प्र

धानमन्त्री ओलीले भन्नुभयो, “यो सरकार अचानक ह्विममा जनताको ‘फ्रस्टेसन’माथि टेकेर बनेको हैन । तात्कालिक सेन्टिमेन्टको भल छोपेर बनेको पनि हैन । सङ्घर्ष र बलिदानको इतिहास छ । विगतमा खेलेको भूमिकाबाट जनताले विश्वास गरेर, अभिमत दिएर लोकतान्त्रिक विधिको माध्यबाट बनेको हो । सरकारको लोकतन्त्रप्रतिको निष्ठाका सम्बन्धमा अनावश्यक भ्रम र हल्ला चलाइएका छन् । अधिनायकवादतर्फ गयो भन्ने कुरा नगरे हुन्छ । जनताले यस्ता कुरा पत्याउँदैनन् ।”

पदाधिकारी सिफारिस एक सातामा
सम्बोधनका क्रममा प्रधानमन्त्री ओलीले सत्य निरुपण तथा मेलमिलाप आयोग र बेपत्ता पारिएका व्यक्तिको खोजबिनसम्बन्धी आयोगका पदाधिकारी सिफारिस एक साताभित्र हुने बताउनुभयो । सिफारिस समिति क्रियाशील रहेको बताउँदै उहाँले समितिले पदाधिकारी सिफारिस गर्नासाथ आयोग गठन हुने जानकारी दिनुभयो ।

प्रधानमन्त्रीको सम्बोधनलगत्तै नेपाल कम्युनिस्ट पार्टीका अर्का अध्यक्ष पुष्पकमल दाहाल ‘प्रचण्ड’, प्रमुख विपक्षी दलका नेता शेरबहादुर देउवाले आयोग गठन सम्बन्धमा परामर्शसमेत गर्नुभएको थियो । सङ्घीय संसद् भवनमा केही बेर छलफलपछि उहाँहरू बाहिरिनुभएको थियो । नेकपाका एक नेताले आयोगका पदाधिकारी सिफारिस सम्बन्धमा छलफल भएको बताउनुभयो ।

यस्तै सदनमा सम्बोधनका क्रममा प्रधानमन्त्रीले वित्त परिषद्को बैठक चाँडै नै बस्ने जानकारी दिनुभयो । यस्तै अन्तरप्रदेश समन्वयसम्बन्धी बैठकको पनि तयारी भइरहेको उहाँले बताउनुभयो । उहाँले तराईका जिल्लाहरूमा गत महिनाको बाढीपीडितलाई पुनःस्थापना गर्न सरकार क्रियाशील रहेको जानकारी दिनुभयो । गत चैतमा बारा र पर्सामा आएको हुरीका क्रममा विस्थापित परिवारलाई यही महिनाभित्रै आवास हस्तान्तरण गरिने उहाँले बताउनुभयो । नेपाली सेनाले आवास निर्माणको जिम्मेवारी पाएको थियो । निर्माण कार्य अन्तिम चरणमा छ । यो समाचार आजको गोरखापत्र दैनिकको प्रथम पृष्ठमा प्रकाशित छ । यसलाई नारायण काफ्लेले तयार पार्नु भएको हो ।

प्रतिक्रिया दिनुहोस