• २०८१ जेष्ठ ११ गते शुक्रवार

सहकारी मुलुक समृद्धिको आधार : मन्त्री विक

पढ्न लाग्ने समय : २ मिनेट
  • सौगात राज बराल, कास्की

भाद्र १५ कास्की । युवा तथा खेलकूदमन्त्री जगतबहादुर विश्वकर्माले सहकारी मुलुकको समृद्धिको आधार भएको बताएका छन् । पोखरा महानगरपालिका–१७ मा सञ्चालित बिरुवा बचत तथा ऋण सहकारी संस्थाको आठौँ वार्षिक साधारणसभाको उद्घाटन गर्दै उनले सहकारी उत्पादनसँग जोडिनुपर्ने खाँचो औँल्याए ।

नेपालमा प्रचूर सम्भावना भए पनि प्राकृतिक स्रोतसाधनको भरपुर उपयोग हुन नसक्दा अवसरको खोजीमा युवाहरू अरवको खाडीमा श्रम गर्न बाध्य भएको उल्लेख गर्दै उनले सहकारीले संकलित रकम आयमूलक कार्यमा लगानी गरी रोजगार सिर्जना गर्ने तर्फ लाग्नुपर्नेमा जोड दिए ।मन्त्री विश्वकर्माले सरकारले सरकारी, निजी र सहकारी तीनखम्बे नीतिलाई समृद्धिको आधारको रुपमा लिएको उल्लेख गर्दै लक्ष्य प्राप्तिका लागि सबै क्षेत्रको सहयोग आवश्यक रहेको बताए ।


मुलुकमा सुशासन, विकास र समृद्धि बनाउने कुनै पार्टी वा नेताको बहादुरीले प्राप्त नहुने भन्दै उनले मुलुकको समग्र प्रगति र समृद्धिका लागि एकताबद्ध हुनुको विकल्प नरहेको विचार व्यक्त गरे ।मन्त्री विश्वकर्माले पोखरा खेलकूदको लागि बाह्रै महीना उपयुक्त स्थान रहेको उल्लेख गर्दै त्यसका लागि सरकार आवश्यक भौतिक पूर्वाधार निर्माणमा जुटेको धारणा व्यक्त गरे ।आगामी मङ्सिरमा काठमाडौँ र पोखरामा हुने दक्षिण एसियाली खेलकूद प्रतियोगिताको तयारी तीव्ररुपमा भइरहेको जानकारी दिँदै उनले प्रतियोगिताले मुलुकको पर्यटन विकासमा समेत टेवा पुग्ने विश्वास व्यक्त गरे ।कास्की बचत संघका अध्यक्ष सुदीप ढकालले सहकारीले मुलुकमा ६५ हजारभन्दा बढीलाई रोजगार प्रदान गरेको बताउँदै सहकारीप्रति राज्य जिम्मेवार हुनुपर्नेमा जोड दिए ।

 

कार्यक्रममा ८० वर्ष उमेर पुगेका शेयर सदस्यका नौ बुबाआमाका साथै विभिन्न तहमा सर्वोत्कृष्ट अङ्क हासिल गर्ने विद्यार्थीलाई सम्मान गरिएको थियो । सोही अवसरमा सहकारीका उत्कृष्ट कारोवारी र कर्मचारी पनि सम्मान गरिएको थियो ।संस्थाका अध्यक्ष चित्रराज बरालको अध्यक्षतामा भएको कार्यक्रममा संस्थापक अध्यक्ष भेषराज बराल, पोखरा पर्यटन परिषद्का अध्यक्ष चिरञ्जीवी पोखरेल, समाजिक अभियन्ता सुष्मा पौडेल, संस्थाको उपाध्यक्ष शिवराज आचार्य, विद्यार्थी आयुष्मा बराललगायतले सहकारीको महत्व र यसले मुलुकको विकासमा खेलेको भूमिकामाथि प्रकाश पारेका थिए ।

प्रतिक्रिया दिनुहोस