फागुन १७, पोखरा । ताप्लेजुङ हेलिकोप्टर दुर्घटनामा निधन भएका संस्कृति, पर्यटन तथा नागरिक उड्डयनमन्त्री रविन्द्र अधिकारीको राजकीय सम्मानका साथ अन्त्येष्टि गरिएको छ । रवीन्द्रको पार्थिव शरीरमा श्रीमति विद्या र छोराले दागबत्ति दिएका छन् ।
मन्त्री अधिकारीको राजकीय सम्मानका साथ रामघाटमा अन्त्येष्टि गरिएको हो । रामघाटमा मन्त्री अधिकारीको पार्थिव शरीरमा श्रीमती विद्या, छोराहरु विराज र स्वराजले दागबत्ति दिँदै अन्तिम बिदाइ गरे । रामघाट लानुअघि अधिकारीको पार्थिव शरीर अन्तिम श्रद्धाञ्जलीका लागि पोखराकै प्रदर्शनी केन्द्रमा राखिएको थियो ।
प्रदर्शनी केन्द्रमा प्रिय नेतालाई श्रद्धाञ्जली दिन हजारौँको संख्यामा नेता, कार्यकर्ता र स्थानीयबासी उर्लिएका थिए ।
टुँडिखेलमा श्रद्धाञ्जली दिएपछि नेपाली सेनाको स्काई ट्रकबाट अधिकारीको शव गृहनगर पोखरा पुर्याइएको थियो ।
रामघाट लानुअघि मन्त्री अधिकारीको पार्थिव शरिरमा उपप्रधान तथा रक्षामन्त्री ईश्वर पोखरेल र गण्डकी प्रदेशका मुख्यमन्त्री पृथ्वीसुब्बा गुरुङले राष्ट्रिय झण्डा ओढाएका थिए । त्यसैगरी नेकपा नेता बामदेव गौतम र प्रवक्ता नारायणकाजी श्रेष्ठले पार्टीको झण्डा ओढाएका थिए ।
