समृद्धिको शर्त : स्वच्छ वायु, स्वस्थ जीवन – मन्त्री बस्नेत

Khabar24Nepal Author Logo..
पढ्न लाग्ने समय : २ मिनेट
  • रेशम बहादुर खड्का, जाजरकोट

जेठ २९, जाजरकोट । वन तथा वातावरणमन्त्री शक्तिबहादुर बस्नेतले बढ्दो शहरीकरणसँगै प्रदूषण बढेकाले समृद्धिको शर्तका रुपमा ‘स्वच्छ वायु, स्वस्थ जीवन’को नारा अघि सारिएको बताए ।यस वर्षको सप्ताहव्यापी विश्व वातावरण दिवस समापन समारोहमा बस्नेतले स्वच्छ वायुमा बाँच्न पाउने अधिकार सुनिश्चित गरिनुपर्ने आवश्यकता औँल्याए ।

“प्रदूषकलाई जिम्मेवार बनाउने संविधानको सिद्धान्तमा ध्यान दिएर अबका कार्यक्रम बन्नुपर्छ, वातावरण संरक्षणलाई अभियानको रुप दिई एकीकृत पहल थालिनुपर्छ, फोहर व्यवस्थापनमा जनसहभागिता बढाइनुपर्छ”, मन्त्री बस्नेतले बताए । सांसद शान्तिमाया पाख्रिनले वातावरण सफा र स्वच्छ बनाउन सामूहिक रुपमा लाग्नुपर्ने बताउए । हिमाल पग्लने, झरना र मूलका पानी सुक्ने जस्ता वातावरणीय समस्या समाधानका लागि समन्वयात्मक कार्यक्रम जरुरी रहेको बस्नेतकोे भनाइ थियो ।

मन्त्रालयका सचिव विश्वनाथ ओलीले नेपालगञ्जमा सम्पन्न वातावरण संरक्षण र जलवायु परिवर्तनसम्बन्धी गोष्ठीले जारी गरेको १७ बुँदे घोषणापत्रका आधारमा प्रदेश नं ५, कर्णाली र सुदूरपश्चिम प्रदेशका स्थानीय तहले नीति तथा कार्यक्रम र बजेटमा समावेश गरिने विश्वास व्यक्त गरे । “पहिलोपटक वातावरण नीति मन्त्रिपरिषद्मा पेश गरिएको छ, वातावरण संरक्षण ऐनमा गरिएको संशोधनसम्बन्धी विधेयक संसदीय समितिमा दफावार छलफलका क्रममा छ, नीतिगत र कानूनी पक्ष बलियो बनाइ वातावरणीय क्षेत्रमा सुधारको प्रयास गरिनेछ”, बस्नेतले भने । मन्त्रालयले ‘एक नागरिक, एक फलफूलको बिरुवा रोपण’ कार्यक्रमलाई निरन्तरता दिएको जनाएको छ । आगामी आर्थिक वर्षलाई वृक्षरोपण वर्षका रुपमा घोषणा गरिएको छ । आगामी असार १४ गते वृक्षरोपण महोत्सवका रुपमा मनाउन लागिएको छ । सो अवसरमा वातावरण विज्ञ भूषण तुलाधरले नेपालगञ्ज घोषणापत्रलाई कागजमा मात्र सीमित नगरी कार्यान्वयन गरिनुपर्ने बताए । लुम्बिनीमा प्रदूषण नियन्त्रणका लागि गुरुयोजना बनाइनुपर्नेमा उहाँले जोड दिए ।

कार्यक्रममा अधिवक्ता पद्मबहादुर श्रेष्ठलाई यस वर्षको वातावरण संरक्षण पुरस्कार, मनोजकुमार गुप्तालाई जलवायु व्यवस्थापन पुरस्कार र पत्रकार प्रगति ढकाललाई वातावरण संरक्षण उत्कृष्ट पत्रकारिता पुरस्कार प्रदान गरिएको थियो । सो अवसरमा वातावरण विभागले प्रकाशन गरेको जर्नलको पाँचौँ अङ्क र कञ्चनजङ्घा संरक्षण समूहको पुस्तक मन्त्री बस्नेतले सार्वजनिक गरेका थिए ।

प्रतिक्रिया दिनुहोस